Сёлета традыцыі святкавання «Дажынак» споўнілася 30 гадоў. І, як падкрэсліў Дзмітрый Крутой, за гэты час аграрны сектар краіны паказаў сапраўдны прарыў. 

«Сёння гэта сусветны ўзровень па любым прадукце харчавання. Наша краіна ўваходзіць у пяцёрку або дзясятку найбуйнейшых экспарцёраў у свеце. А атрыманыя $10 млрд экспарту — гэта фантастыка, пра якую яшчэ нават 10 гадоў таму нельга было марыць. І попыт расце, — адзначыў ён. — Вялікая колькасць інвестыцыйных праектаў. Напэўна, у нашым інвестыцыйным партфелі доля аграрнага сектара займае дзесьці 20-25%. Укараняюцца высокія тэхналогіі, з’яўляюцца новыя прадукты сусветнага ўзроўню. Вось з Кітаем цяпер шэраг праектаў абмяркоўваецца».

Як сказаў кіраўнік Адміністрацыі Прэзідэнта, гэта топавыя праекты, а многія з іх — упершыню будуць рэалізоўвацца на тэрыторыі Беларусі. 

«Аграрны сектар развіваецца каласальным чынам. І задачы, якія стаяць перад гэтай сферай да 2030 года, таксама вельмі амбіцыйныя, — сказаў ён. — Тут цяпер ідзе гонка не за валавымі лічбамі. І малака цяпер у нас ужо больш літра на аднаго жыхара. І збожжа вось ужо апошнія гады мы збіраем таксама дастаткова пад тую базу жывёлагадоўлі, якая развіваецца ў рэспубліцы. Тут пытанне цяпер эфектыўнасці».

Ён таксама нагадаў, што Прэзідэнт пастаянна кажа аб змене сістэмы субсідзіравання вёскі. А яшчэ ён нагадаў фразу Аляксандра Лукашэнкі пра тое, што горад завінаваціўся сялу. І адзін з прыкладаў такой працы — шэфская падтрымка аграрных прадпрыемстваў арганізацыямі. Дзмітрый Крутой адзначыў, што пры гэтым не патрабуецца ніякіх буйных уліванняў. І такая падтрымка патрэбная.