Пракуратура горада Мінска накіравала ў суд крымінальную справу ў дачыненні да замежнага грамадзяніна — яму інкрымінавана махлярства ў асабліва буйным памеры, учыненае групай асоб. Аб гэтым паведаміла служба інфармацыі пракуратуры сталіцы.
Паводле матэрыялаў крымінальнай справы, абвінавачаны не пазней за май 2022 года ўступіў у злачынную змову з ураджэнцамі горада Гродна і сталіцы. Выкарыстоўваючы выдуманую гісторыю, прапанаваў свайму знаёмаму выгадную прапанову: выкупіць ліцэнзію на камп’ютарную гульню і ў далейшым інвесціраваць сродкі ў яе ўдасканаленне для далейшай рэалізацыі.
Аднак за прывабнымі абяцаннямі хаваўся старанна спланаваны зман. Ніводны з членаў злачыннай групы не валодаў праграмным кодам заяўленай відэагульні.
Дэманструючы бурную дзейнасць, пацярпеламу даваліся фіктыўныя дагаворы, аформленыя зламыснікамі, тэхнічныя спецыфікацыі, а таксама ілжывыя звесткі аб супрацоўніках, якія прыцягваюцца да распрацоўкі праекта, нібы ажыццяўляюць дапрацоўку гульнявога прадукту. Інсцэніроўка работ па стварэнню новых персанажаў, а таксама штучна ствараемыя тэхнічныя праблемы выкарыстоўваліся ў якасці падставы для рэгулярнага атрымання дадатковых грашовых сродкаў.
Адзін з саўдзельнікаў, па-майстэрску выканаўшы ролю патэнцыйнага замежнага пакупніка праграмнага забеспячэння, пераканаў пацярпелага не спыняць інвестыцыі ў заведама нерэалізуемы праект. Не западозрыўшы падвоху, ахвяра падману працягнула ўкладваць зберажэнні ў неіснуючую распрацоўку.
У выніку злачыннай дзейнасці фігуранты прычынілі пацярпеламу матэрыяльную шкоду на суму больш за 3 млн рублёў.
Крымінальная справа ў дачыненні да замежнага грамадзяніна была выдзелена ў асобную вытворчасць у сувязі са знаходжаннем яго ў вышуку. Абвінавачаны збіраўся з’ехаць з Беларусі, аднак быў затрыманы.
Прыгаворам суда Першамайскага раёна г. Мінска два іншыя фігуранты злачыннай схемы прызнаны вінаватымі ў махлярстве, учыненым групай асоб у асабліва буйным памеры, і на падставе ч.4 арт.209 Крымінальнага кодэкса Рэспублікі Беларусь ім назначана пакаранне ў выглядзе пазбаўлення волі на тэрмін 6 гадоў і 5 гадоў са штрафам у памеры 100 базавых велічыняў (4,5 тыс. рублёў) адпаведна.
Прыгавор суда ўступіў у законную сілу.
Пасля вывучэння матэрыялаў справы ў пракуратуры горада Мінска прыйшлі да высновы аб абгрунтаванасці абвінавачання, дастатковасці сабраных доказаў, поўным і аб’ектыўным даследаванні акалічнасцей злачынства.
Абраная раней у дачыненні да абвінавачанага мера стрымання ў выглядзе ўзяцця пад варту намеснікам пракурора горада Мінска пры накіраванні справы ў суд пакінута без змянення.
