Адкрываючы рабочае мерапрыемства, Аляксандр Турчын абазначыў шэраг пытанняў, якія падлягаюць абмеркаванню. «Перш за ўсё, гэта рэгістрацыя новых рэзідэнтаў Парка высокіх тэхналогій і адабрэнне новых бізнес-праектаў. Яшчэ адна важная тэма — уключэнне новага віду дзейнасці з ужываннем адытыўных тэхналогій. Не можам абысціся і без крыптасферы. Фактычна кожнае пасяджэнне Назіральнага савета так ці інакш з гэтым звязана», — пералічыў Прэм’ер-міністр. 

«Мы бачым перспектывы ў гэтым»

Начальнік Сакратарыята Назіральнага савета Парка высокіх тэхналогій Ганна РАБАВА падчас размовы з журналістамі паведаміла, што адытыўныя тэхналогіі — гэта не толькі вытворчы цыкл, але і той самы праграмна-апаратны комплекс. 

«Таму мы прапануем яго, не зацягваючы, ўключаць, і затым замацоўваць гэта нарматыўна, — дадала Ганна Рабава. — Калі гаварыць аб адытыўных тэхналогіях, зразумелая асацыяцыя — 3D-прынтар. У прынцыпе, любая інавацыйная дробная вытворчасць, якую нельга адразу запускаць у прамысловую, патрабуе кропкавага, але вельмі якаснага вырабу дэталяў. Пад яе пішацца софт і закладваюцца асобныя праграмы, якія дазваляюць апрабаваць зусім новыя складаныя прыборы, запускаць абсалютна новыя тэхпрацэсы. Гэта (адытыўныя тэхналогіі. — „Зв.“) вельмі каштоўны інструмент, які адаптаваны менавіта пад інавацыйную вытворчасць».

Ганна Рабава таксама адзначыла, што сярод айчынных кампаній-заказчыкаў адытыўная тэхналогіі вельмі запатрабаваныя. «Часам трэба вырашыць нейкую праблему або апрабаваць якое-небудзь новае абсталяванне, для якога вельмі складана знайсці пастаўшчыка незвычайных дэталяў або нейкіх рашэнняў. Адытыўныя тэхналогіі вырашаюць менавіта гэтую задачу», — падкрэсліла яна.

Акрамя таго, падчас пасяджэння было прапанавана зарэгістраваць больш за 30 новых рэзідэнтаў ПВТ. «Хацела б адзначыць, што з тых кампаній, якія да нас прыходзяць, ужо толькі малая доля працуе як заказныя, астатнія — як прадуктовыя або змешаныя мадэлі. Гэта нас вельмі радуе», — сказала Ганна Рабава.

Асобна яна спынілася на тэме падтрымкі стартап-сістэмы. «Пазаўчора мы правялі найбуйнейшы ў нашай гісторыі стартап-форум Space Day. У нас было амаль 2 тысячы ініцыятыўных маладых удзельнікаў. Вельмі шмат бізнес-кампаній было прадстаўлена. Форум знайшоў проста выдатную падтрымку. Мы ўручылі гранты тым, каго адабраў Сакратарыят па даручэнні Назіральнага савета. Атрыманы самы пазітыўны водгук», — падкрэсліла начальнік Сакратарыята назіральнага савета ПВТ.

«Дадзены фінансава-тэхналагічны сектар развіваецца вельмі дынамічна»

Першы намеснік начальніка Сакратарыята Назіральнага савета Парка высокіх тэхналогій Дзмітрый КАЛЕЧЫЦ у размове з журналістамі расказаў, што падчас рабочага мерапрыемства абмеркавалі шэраг пытанняў, звязаных з дасканалым развіццём сферы лічбавых знакаў (токенаў).

«Дадзены фінансава-тэхналагічны сектар развіваецца вельмі дынамічна. Трэба сказаць, што ўсе ключавыя паказчыкі развіцця — выручка, экспарт, грашовы абарот, падаткі, якія выплачваюцца крыптарэзідэнтамі, — выраслі больш чым у два разы адносна першага паўгоддзя мінулага года», — дадаў Дзмітрый Калечыц.

На пасяджэнні разгледзелі пытанне, звязанае з далейшым удасканаленнем ўзаемадзеяння заяўнікаў і крыптарэзідэнтаў з аўдытарскімі кампаніямі. «Толькі дзве аўдытарскія кампаніі мелі магчымасць ўзаемадзейнічаць з нашымі заяўнікамі і крыптарэзідэнтамі. Пералік пашыраецца да сямі кампаній», — адзначыў ён.

Акрамя таго, былі ўдакладнены заданні, якія павінны быць у справаздачах, што прадстаўляюцца штогод крыптарэзідэнтамі ў Сакратарыят Назіральнага савета ПВТ. Дадаткова ўведзены патрабаванні па асвятленні пытанняў аб адпаведнасці цэлага шэрагу бізнес-працэсаў патрабаванням заканадаўства і актам Назіральнага савета.

Быў таксама разгледжаны шэраг пытанняў па ўдасканаленні работы крыптарэзідэнтаў ў галіне процідзеяння незаконным аперацыям, кібермахлярству. Пасля прыняцця заканадаўчых змяненняў плануецца, што крыптарэзідэнты ПВТ змогуць узаемадзейнічаць з аўтаматызаванай сістэмай апрацоўкі інцыдэнтаў Нацыянальнага банка. Разгледжаны падыходы да арганізацыі гэтага працэсу і тое, якім чынам крыптарэзідэнты павінны рэагаваць на інфармацыю, якая паступае з гэтай сістэмы.

Яна ХМЯЛЬНІЦКАЯ