На вяслярным канале ў Заслаўі стартуе міжнародны турнір па веславанні на байдарках і каноэ «Кубак мацнейшых спартсменаў» з удзелам прадстаўнікоў пяці краін, паведамляе БелТА.

На спаборніцтвах выступяць каля 250 весляроў з Беларусі, Расіі, Узбекістана, Казахстана і Кітая, якія вызначаць лепшых у 23 відах праграм. Першыя камплекты ўзнагарод будуць разыграны вечарам 18 чэрвеня — фіналы ў змешаных байдарках-двойцы і каноэ-двойцы на 500 м стартуюць у 18.00.

Чацвер распісаны пад папярэднія і паўфінальныя заезды, а ў пятніцу адбудуцца чатыры адзіночныя фіналы: на дыстанцыі 1000 м у мужчын у абодвух відах лодак, на 500-метроўцы ў байдарачніц і на 200-метроўцы ў канаістак.

У ранішняй праграме 21 чэрвеня пройдуць вырашальныя заезды ў мужчынскіх і жаночых байдарках-двойках і каноэ-двойках на 500 м. На вечар суботы запланаваны індывідуальныя фіналы ў спрынце на 200 м у байдарачнікаў і канаістаў, а таксама ў жаночай каноэ-двойцы.

Раніцай заключнага дня турніру 22 чэрвеня хлопцы выявяць прызёраў у адзіночных байдарцы і каноэ на 500 м, канаісткі паспрачаюцца за ўзнагароды на 500-метроўцы, а байдарачніцы — на 200-метроўцы. Днём нядзелі адбудуцца два медальныя заезды сярод байдарак-чацвёрак, праграму Кубка мацнейшых завершаць чатыры адзіночныя фіналы на дыстанцыі 5000 м.