На спаборніцтвы заявіліся каля 150 лепшых трэкавых гоншчыкаў з Беларусі і Расіі, у ліку ўдзельнікаў — чэмпіёны свету і Еўропы. На працягу пяці спаборніцкіх дзён веласіпедысты разыграюць дваццаць камплектаў узнагарод (па дзесяць у мужчын і жанчын). 

«Сёлета Беларусь і Расія правялі Кубкі наймацнейшых спартсменаў па трох зімовых і адзінаццаці летніх відах спорту, дзе выступілі больш за дзве тысячы атлетаў з розных краін. Зараз надышла чарга веласпорту, мы рады вітаць усіх у сценах легендарнай „Мінск-Арэны“. Аншлаг на трыбунах ужо ў першы дзень — разлічваю, што пры такой падтрымцы гоншчыкі пакажуць высокія вынікі і паб’юць некалькі рэкордаў», — сказаў першы намеснік міністра спорту і турызму Аляксандр Дараховіч.

«Мінск — вельмі дружалюбны горад у дачыненні да спорту, і асабліва веласіпеднага. Толькі што скончыліся спаборніцтвы „Першы веласіпед“, з якіх пачынаюцца вялікія перамогі, — адзначыў старшыня Мінгарсавета Арцём Цуран. — Хочацца, каб поспехі ў спорце рухалі нашу моладзь да здаровага ладу жыцця і праслаўлялі краіну далёка за яе межамі. Жадаю заўзятарам атрымаць асалоду ад таго, што адбываецца, каб усе сышлі з добрым настроем».

«Шчаслівая, што Мінскі веладром зноў прымае міжнародныя спаборніцтвы. Многія ўдзельнікі яшчэ даволі юныя, але ўжо вельмі моцныя. Спадзяюся, гэты турнір стане для іх крокам у далейшае пераможнае жыццё. А гледачам жадаю палюбіць веласпорт так, як любім яго мы», — сказала кіраўнік Беларускай федэрацыі веласпорту, прызёр Алімпійскіх гульняў Наталля Цылінская.

Удзельнікі Кубка наймацнейшых спартсменаў вызначаць найлепшых у асабістым і камандным спрынце, гіце, омніуме, скрэтчы, кейрыне, мэдысане, каманднай гонцы праследавання, гонцы па ачках і гонцы на выбыванне. Турнір працягнецца па 19 кастрычніка.