«У Беларусі беражліва захоўваюць свяшчэнную памяць пакаленняў: тут гісторыя не адыходзіць у мінулае — яна жыве ў сэрцах людзей, у абелісках і мемарыялах, у цішыні каля Вечнага агню і ў слёзах ветэранаў. Павага да гераічнага подзвігу продкаў, смутак аб загінулых і гордасць за Перамогу — не проста словы, а маральны кодэкс беларускай нацыі, які перадаецца ад бацькі да сына. Мемарыялы, музеі і памятныя месцы — не проста кропкі на карце. Іх наведванне — свяшчэнны абавязак і неад’емная частка любога гісторыка-культурнага турыстычнага маршрута», — адзначылі ў Нацыянальным агенцтве па турызме.

Для жыхароў і гасцей краіны распрацаваны тэматычныя экскурсіі «Дарогай да «Лініі Сталіна», «Лёсы, апаленыя вайной», «Аўгустоўскі канал у гісторыі Першай і Другой сусветных войнаў», «Няскораны Мінск», «Мядзельшчына ў агні войнаў», «Ведаць і памятаць: лагер Малы Трасцянец», «Палонная праўда. Гісторыя шталага-352», «Страчаны рай: жыццё і катастрофа беларускіх штэтлаў».

Сярод найбольш папулярных месцаў воінскай славы, якія часцей за ўсё ўключаюць у экскурсійныя маршруты, можна выдзеліць сімвал мужнасці абаронцаў, прыняўшых першы ўдар вайны — «Брэсцкую крэпасць-герой», трагічны сімвал усіх спаленых беларускіх вёсак — мемарыяльны комплекс «Хатынь», манумент у гонар вызвалення Беларусі ад нямецка-фашысцкіх захопнікаў — Курган Славы, гісторыка-культурны комплекс «Лінія Сталіна», Музей гісторыі Вялікай Айчыннай вайны ў Мінску, месца бязлітасных баёў пад Магілёвам — Буйніцкае поле, мемарыял дзецям — вязням канцлагераў у Чырвоным Беразе на Гомельшчыне.

«Напярэдадні Дня Перамогі Беларусь традыцыйна з’яўляецца адным з асноўных турыстычных напрамкаў у замежных і ў першую чаргу расійскіх турыстаў, якія прыязджаюць у краіну, каб пакланіцца подзвігу савецкага народа, убачыць маштабныя ваенна-гістарычныя рэканструкцыі, наведаць знакамітыя мемарыялы, уключыцца ў жывое святкаванне са слязамі на вачах і песнямі Перамогі», — адзначылі ў Нацыянальным агенцтве па турызме.

У 2026 годзе беларускія турыстычныя кампаніі падрыхтавалі некалькі спецыялізаваных маршрутаў і праграм да 9 мая. Напрыклад, чыгуначны тур па маршруце Віцебск — Брэст — Віцебск «Поезд Памяці «Дарогамі Перамогі» прапануе ўнікальную магчымасць сустрэць Дзень Перамогі непасрэдна ў Брэсцкай крэпасці, дзе праходзяць самыя маштабныя ўрачыстасці. А аднадзённы аўтобусны тур з Мінска «Ведаць і памятаць: Хатынь і Курган Славы» ідэальна падыдзе тым, хто знаходзіцца ў Мінску і хоча 9 мая наведаць два знакавыя мемарыялы, якія сімвалізуюць трагедыю і трыумф беларускага народа.

У святочныя выхадныя 9 і 10 мая гісторыка-культурны комплекс «Лінія Сталіна» праводзіць маштабную рэканструкцыю аднаго з этапаў Берлінскай аперацыі — фінальнай бітвы вайны. Акрамя гэтага, гасцей чакаюць канцэрты, паказальныя выступленні і магчымасць пакаштаваць салдацкую кашу з палявой кухні.