З самай раніцы на вуліцы Пушкіна можна будзе ўбачыць работы майстроў, якія ўдзельнічаюць у адкрытым абласным свяце-конкурсе па выцінанцы «Ажурныя мары».

Дні моладзі пройдуць на фестывалі. Яны стартуюць з патрыятычнай акцыі — шэсця «Марш пераможцаў», якое пройдзе да мемарыяльнага комплексу ў гонар воінаў-вызваліцеляў, партызан і падпольшчыкаў Віцебшчыны. Тут адбудзецца ўрачыстае адкрыццё мерапрыемства.

• У Беларускім тэатры «Лялька» ў 11.00, 13.00 і 19.00 калектывы з Пензы і Ніжняга Ноўгарада прапануюць свае пастаноўкі.

Віцебскі абласны краязнаўчы музей запрашае ў 12.00 на прэзентацыю выставы мастацкай фатаграфіі «Керч Антычная».

Лаўрэаты XXIII Міжнароднага дзіцячага музычнага конкурсу «Віцебск» у 13.00 выступяць на гала-канцэрце, дзе ім уручаць заслужаныя ўзнагароды. У гэтым годзе ўпершыню будзе прысуджана прэмія Выканкама СНД — крыштальная нотка Садружнасці.

У 13.00 на плошчы ля помніка Пушкіна разгорнецца свята казачай культуры і традыцый, дзе творчыя нумары прадэманструюць прадстаўнікі казацтва Беларусі і Расіі.

Удзельнікі XXXIV Міжнароднага конкурсу выканаўцаў эстраднай песні «Віцебск» сёння даведаюцца нумары, пад якімі яны выступяць падчас творчага іспыту. Беларусь прадставіць ужо даволі вядомая маладая спявачка Валерыя Бернатовіч. Яна будзе спаборнічаць з яшчэ 13 прэтэндэнтамі на галоўны прыз — «Ліру». І ўпершыню Лера выйдзе на сцэну па-за дуэтам з Арцёмам Скаралем. Для дзяўчыны гэта будзе сур’ёзным выпрабаваннем. Для дзяўчыны гэта будзе сур’ёзным выпрабаваннем.

З шоу-праграмай «Моцная жанчына» ў абласной філармоніі ў 18.00 выступіць грузінская артыстка Этэры Берыяшвілі. У той жа час у Віцебскім дзяржаўным музычным каледжы імя І.І.Салярцінскага пройдзе канцэрт «Трыа балалаек».

• Цэнтральным мерапрыемствам дзён Саюзнай дзяржавы стане гала-канцэрт з удзелам выканаўцаў і калектываў з Беларусі і Расіі. Упершыню сваё майстэрства на фестывальнай сцэне прадэманструюць прэзідэнцкія аркестры дзвюх краін. Атрымаць асалоду ад яркіх нумароў можна будзе ў 18.30 у Летнім амфітэатры.

У тэатральнай праграме заяўлены спектакль «Жаніцьба». У 19.00 на коласаўскай сцэне яго прадставіць Беларускі дзяржаўны тэатр юнага гледача.

На сустрэчу з расійскім акцёрам Максімам Аверыным запрашаюць у Канцэртную залу «Віцебск» у 20.00. Ён прэзентуе монаспектакль «Навучы мяне жыць...».

У 10 гадзін вечара ў Віцебскім цэнтральным спартыўным комплексе загучаць «Рытмы лета». Ваня Дзмітрыенка, Алег Маямі, Вольга Бузава, Лера Бернатовіч і Арцём Скароль не дадуць сумаваць гледачам і ўзнімуць настрой, нават калі ён прыпсаваны традыцыйнымі фестывальнымі дажджамі.

Начны канцэрт «Залаты хіт» у Летнім амфітэатры — гэтае мерапрыемства для тых, хто не спіць і любіць бавіць час весела. У 1.30 над Віцебскам пальюцца песні гурта «Божая кароўка», «Рок-астравы», «Дыскамафія». А яшчэ падчас гэтага канцэрта дазваляецца і нават рэкамендуецца не сядзець на месцы, падпяваць артыстам і танцаваць да самай раніцы.