Аграрыі практычна завяршылі ўборку збожжавых і зернебабовых культур: засталіся каля 13 тыс. га грэчкі, крыху больш за тысячу га проса і асобныя ўчасткі, дзе растуць лубін і іншыя высокабялковыя культуры, якія крыху даўжэй саспяваюць з-за біялагічных асаблівасцей.

«У бліжэйшыя дзень-два пры спрыяльных умовах уборка збожжавых і зернебабовых будзе завершана. Застанецца на зерне ўбраць толькі кукурузу — каля 390 тыс. га. Плануецца нарыхтаваць каля 2,3 млн т збожжа», — расказаў Мікалай Лешык.

Таксама прадаўжаецца ўборка лёну. На 52% плошчы льнотраста паднята ўжо, яе вывозяць з палёў. «Дажджлівае надвор’е крыху стрымлівае работы. Тэхнічна гатовы да пастаўленай задачы, механізм прагавораны. Ёсць запэўненні на месцах, што работа будзе актывізавана і завершана як патрабуе тэхнічны рэгламент — да 25 верасня. Гэты перыяд найбольш спрыяльны для вылежкі трасты, яе нарыхтоўкі, каб атрымаць прадукцыю найбольш высокай якасці», — дадаў Мікалай Лешык.

Раней на пяць дзён, чым у 2025 годзе, сельгасарганізацыі пачалі ўборку цукровых буракоў, каб завяршыць іх у аптымальныя тэрміны. У мінулым сезоне атрыманы рэкордны ўраджай. «Бягучы год з-за пэўных умоў надвор’я па Брэсцкім рэгіёне пакуль дае магчымасць прагназаваць невялікае зніжэнне валу. Чакаем сабраць каля 5,8 млн т карняплодаў», — расказаў Мікалай Лешык.

Ідзе ўборка бульбы, тэмпы пакуль нязначныя. Паводле статыстыкі папярэдніх гадоў, вытворчасць у асабістых падсобных гаспадарках ацэньваецца на ўзроўні 3 млн т, у вялікіх сельскагаспадарчых і фермерскіх гаспадарках — у аб’ёме каля 900 тыс. — 1 млн т. У стабілізацыйныя фонды будзе накіравана 60 тыс.т.

Убрана каля 27% агародніны — 2,1 тыс. га, з якіх 1,6 тыс. га займае зялёны гарошак. У невялікіх аб’ёмах сабраны капуста, цыбуля, буракі, морква (раннія сарты, якія пастаўляюцца са жніўня ў гандлёвыя аб’екты), кабачкі, спаржа. Гатовы аграрыі і да ўборкі беларускіх кавуноў.

Акрамя таго, вядзецца работа па закладцы фундамента для ўраджаю будучага года. Пачалася сяўба азімых.

Па асноўных культурах збожжавых практычна завершана пастаўка ўраджаю па дзяржзаказу. Па агародніннай прадукцыі ў дзяржзаказ уключаны агуркі і памідоры, якія будуць вырошчвацца ў міжсезонны перыяд у сучасных цяплічных камбінатах, мадэрнізаваных або пабудаваных з дапамогай дзяржавы. У стабілізацыйны фонд будзе закладзена каля 27 тыс. т яблыкаў. Год аказаўся спрыяльным, прагназуецца ўраджай на ўзроўні 170-175 тыс.т.

«Уборку яблыкаў ранніх сартоў пачалі ўжо. На бягучую дату, паводле аператыўных даных, сабрана каля 7 тыс. т, якія пастаўляліся як на паліцы магазінаў, так і на перапрацоўчыя прадпрыемствы», — дадаў Мікалай Лешык.