Натарыус Гродзенскай натарыяльнай акругі Алена Палічэйка патлумачыла: адзіны законны спосаб стаць уладальнікам аўтамабіля — заключыць дагавор куплі-продажу. Калі ж прадавец проста выдае даверанасць і атрымлівае грошы, юрыдычна ўласнік машыны не мяняецца.

Фактычна аўтамабіль па-ранейшаму належыць прадаўцу, а пакупнік застаецца толькі часовым карыстальнікам.

Якія праблемы могуць узнікнуць

• прадавец можа ў любы момант адклікаць даверанасць;

• калі ўладальнік памрэ, дакумент аўтаматычна страціць сілу, і аўтамабіль прыйдзецца вяртаць спадчыннікам;

• пры разводзе прадаўца машына можа трапіць пад падзел маёмасці;

• на аўтамабіль могуць накласці арышт з-за даўгоў ранейшага ўладальніка;

• пасля заканчэння тэрміну даверанасці новы дакумент могуць проста не выдаць.

Самы надзейны спосаб — заключыць пісьмовы дагавор куплі-продажу. Яго можна:

Зарэгістраваць у ДАІ адначасова з пастаноўкай аўтамабіля на ўлік або зняццем з яго, альбо засведчыць у натарыуса.

Для натарыяльнага афармлення спатрэбіцца тэхпашпарт з адзнакай аб зняцці машыны з уліку.

Калі аўтамабіль сапраўды становіцца вашым

Права ўласнасці ўзнікае толькі пасля дзяржаўнай рэгістрацыі дагавора або яго натарыяльнага засведчання. Менавіта з гэтага моманту пакупнік становіцца законным уладальнікам аўтамабіля.

Спецыялісты раяць не рызыкаваць: даверанасць пры продажы аўтамабіля — гэта не замена здзелцы, а толькі ілюзія пакупкі, якая можа прывесці да сур’ёзных страт.