Прэзідэнт Беларусі Аляксандр Лукашэнка 1 красавіка падпісаў указ № 108, які прадугледжвае стварэнне да 1 ліпеня 2027 года адзінай дзяржаўнай інфармацыйнай сістэмы продажу праязных білетаў на аўтаперавозкі пасажыраў у рэгулярных зносінах. «Наша прадпрыемства „Сталічны транспарт і сувязь“ у адпаведнасці з указам Прэзідэнта будзе з’яўляцца адзіным аператарам, які кансалідуе ўсе працэсы, што будуць завязаны на ўзаемадзеянні з усімі аператарамі Рэспублікі Беларусь, пасажырскімі тэрміналамі, перавозчыкамі, якія будуць выконваць перавозкі ў рэгулярных зносінах», — сказаў Юрый Супрановіч.

Для пасажыраў будзе спрошчаны парадак набыцця дакумента на праезд, пабудовы лагістыкі сваёй паездкі. Для перавозчыкаў таксама будзе спрошчаны пэўны механізм лагістыкі ў фінансавых адносінах. «Што да аператараў, на жаль, на дадзены момант адсутнічае адзінае разуменне працэсаў па асваенні пасажырапатоку, а таксама ацэнцы, алічбоўцы гэтых даных. Гэта сістэма дасць магчымасць аператарам атрымаць адзіную базу і адсочваць усе працэсы, звязаныя з перавозкай пасажыраў у прыгарадных, міжгародніх і міжнародных зносінах», — удакладніў Юрый Супрановіч.

У прэс-службе Прэзідэнта растлумачылі, што дакумент накіраваны на павышэнне ўзроўню камфорту аўтаперавозак пасажыраў у рэгулярных зносінах. Дакументам прадугледжана стварэнне да 

1 ліпеня 2027 года адзінай дзяржаўнай інфармацыйнай сістэмы (ДІС), якая будзе прызначана для браніравання месцаў для праезду, продажу праязных дакументаў і багажных квітанцый на прыгарадныя, міжгароднія і міжнародныя аўтамабільныя перавозкі пасажыраў і багажу ў рэгулярных зносінах.

З дапамогай сістэмы фізічныя асобы таксама змогуць атрымаць звесткі: аб аўтаперавозчыках; аб транспартных сродках, якія выкарыстоўваюцца аўтаперавозчыкамі для выканання аўтаперавозак пасажыраў; аб уладальніках пасажырскіх тэрміналаў, электронных сэрвісаў продажы квіткоў; аб раскладзе руху транспартных сродкаў; аб схемах маршрутаў; аб кошце праязных дакументаў і багажных квітанцый; аб прададзеных праязных дакументах і багажных квітанцыях.

Адзіная ДІС будзе створана на базе дзяржаўнай лічбавай платформы «Разумны горад (рэгіён)». Яна будзе сфарміравана шляхам аб’яднання сістэм браніравання і продажу білетаў, інтэграцыі электронных сэрвісаў пры міжнародных аўтаперавозках пасажыраў. Прававым актам вызначаны склад удзельнікаў, уладальнік і аператар адзінай сістэмы (КУП «Сталічны транспарт і сувязь»), крыніцы фінансавання для яе стварэння і функцыянавання.

Паводле інфармацыі прэс-службы Прэзідэнта Беларусі, не прадугледжваецца павелічэнне расходаў пасажырскіх тэрміналаў і аўтамабільных перавозчыкаў, што не пацягне рост кошту праязных білетаў і багажных квітанцый.

Уладальнікам пасажырскіх тэрміналаў, электронных сэрвісаў продажу ва ўстаноўленым Урадам Рэспублікі Беларусь парадку неабходна да 1 чэрвеня 2027 года падаць аператару заяўку аб інтэграцыі інфармацыйных сістэм (рэсурсаў) з адзінай ДІС і правесці дадзеную інтэграцыю. Пад інтэграцыяй пры гэтым разумеецца арганізацыя электроннага інфармацыйнага ўзаемадзеяння, якое дазваляе ажыццяўляць перадачу, атрыманне звестак і абмен імі з выкарыстаннем такіх сістэм (рэсурсаў) у аўтаматычным і (або) аўтаматызаваным рэжымах.

З 1 ліпеня 2027 года дзейнасць уладальнікаў пасажырскіх тэрміналаў, электронных сэрвісаў продажу білетаў, звязаная з браніраваннем месцаў для праезду, продажам праязных дакументаў і багажных квітанцый на аўтамабільныя перавозкі пасажыраў, без інтэграцыі інфармацыйных сістэм (рэсурсаў) з адзінай ДІС з’яўляецца незаконнай і забараняецца.

Саветам Міністраў Рэспублікі Беларусь у шасцімесячны тэрмін будзе зацверджаны Парадак функцыянавання адзінай ДІС. «З’яўленне айчыннай дзяржаўнай інфармацыйнай сістэмы дазволіць дасягнуць эфекту ад празрыстасці вядзення бізнесу ў сферы перавозак пасажыраў, укараніць лічбавы інструмент для вывучэння пасажырапатоку і аператыўнага прыняцця рашэнняў па аптымізацыі маршрутнай сеткі. Пасажыры будуць атрымліваць актуальную інфармацыю аб раскладзе руху аўтобусаў усіх перавозчыкаў, а таксама змогуць выбіраць аптымальны маршрут паездкі», — паведамілі ў прэс-службе кіраўніка дзяржавы.

Паводле БелТА