У міліцыю звярнуўся 76-гадовы жыхар Гродна, які стаў ахвярай тэлефонных аферыстаў. Устаноўлена, што напярэдадні невядомыя патэлефанавалі мужчыну ў месенджары і паведамілі, што ён падазраецца ў фінансаванні экстрэмісцкай дзейнасці. У ходзе размовы пенсіянер расказаў аб наяўнасці зберажэнняў, якія яму адразу прапанавалі задэклараваць. Пацярпелы перадаў кур'еру больш за Br65 тыс. у эквіваленце.

Як высветлілі праваахоўнікі, 20-гадовы кур’ер прыехаў у Гродна з суседняй краіны і пасля ўчынення злачынства адразу адправіўся назад. На наступны дзень расійскія паліцэйскія затрымалі яго ў Маскве. Грошы пацярпелага канфіскаваны і будуць яму вернуты. Следчыя распачалі крымінальную справу за махлярства ў асабліва буйным памеры. Кур’еру пагражае да 12 гадоў пазбаўлення волі.

Ва УУС нагадалі, што супрацоўнікі праваахоўных органаў, банкаўскіх і іншых устаноў не тэлефануюць грамадзянам у месенджарах. Калі невядомыя па тэлефоне патрабуюць здзейсніць якія-небудзь маніпуляцыі з фінансамі (задэклараваць, пакласці на бяспечны рахунак, аддаць кур’еру і г. д.), варта неадкладна спыніць размову і паведаміць пра гэта ў міліцыю. Памагатыя зламыснікаў нароўні з іншымі ўдзельнікамі злачынных схем прыцягваюцца да крымінальнай адказнасці і абавязаны кампенсаваць прычыненую шкоду.