Незвычайная прыродная славутасць прыцягнула ўвагу не толькі аматараў прыгожых здымкаў, але і наглядных органаў. Моцнае абледзяненне адной з воданапорных вежаў пад Маладзечнам выклікала асцярогі з-за пагрозы для жыцця і здароўя людзей.

Як расказаў памочнік пракурора па асаблівых даручэннях Аляксандр Хамянок, ведамства выявіла аб’ект падчас маніторынгу інтэрнэту. Зімовыя маразы ператварылі вежу ў ледзяны шэдэўр, які імгненна стаў папулярным у сацсетках і прыцягнуў ахвотных зрабіць эфектныя фота.

«Прырода стварыла сапраўды папулярную на прасторах інтэрнэту нагоду наведаць гэтае месца і папоўніць калекцыю прыгожых зімовых фатаграфій. Разам з тым набліжэнне да падобных аб’ектаў часцяком можа скончыцца вельмі плачэўна», — падкрэсліў прадстаўнік пракуратуры.

Каб прадухіліць няшчасныя выпадкі, ведамства прыняло меры і накіравала патрабаванні па выдаленні наледзі з канструкцыі. Акрамя таго, цяпер праводзяцца абследаванні іншых воданапорных вежаў раёна, каб своечасова выявіць падобныя пагрозы.