Камунальныя службы гатовыя да непрыемных сюрпрызаў надвор’я. Гэтым разам Беларусь накрыў цыклон «Леоні» з невялікім павышэннем тэмпературы, а таксама снегам, мокрым снегам і дажджом, утварэннем галалёду.

Камунальныя службы прыступілі да апрацоўкі пешаходных зон і падыходаў да дамоў. Задзейнічана больш за 130 адзінак тэхнікі, звыш 1,6 тыс. рабочых па комплекснай прыборцы і ўтрыманні домаўладанняў, іншых работнікаў ЖЭУ. Выдаткавана 29 т пясчана-салянай сумесі.

«Штодня з самай раніцы камунальныя службы сталіцы прыступаюць да расчысткі дваровых тэрыторый ад снегу і наледзі. Асаблівая ўвага — апрацоўцы двароў супрацьгалалёднымі сродкамі. Гэта ключавая мера для прадухілення траўмаў і забеспячэння бяспечнага перамяшчэння жыхароў», — растлумачылі ў Мінскай гарадской жыллёвай гаспадарцы.

Спецыялісты рэкамендуюць мінчанам у галалёд не забываць пра асабістую бяспеку: насіць зручны абутак з рэльефнай падэшвай, перамяшчацца дробнымі крокамі, злёгку сагнуўшы ногі, не адцягвацца на тэлефон падчас хады, а таксама дапамагаць пажылым суседзям і сачыць за дзецьмі.