У Беларусі спыняць работу таксафонаў і звязаных з імі паслуг. З паведамлення «Белтэлекама» вынікае, што дэмантаж апаратаў пачнецца ўжо 20 студзеня 2026 года, піша mlyn.by.
Сінія тэлефонныя будкі дзесяцігоддзямі служылі для міжгародніх і міжнародных званкоў па папярэдняй аплаце.
Тэлефонныя апараты фірменнага сіняга колеру раней можна было сустрэць на вуліцах беларускіх гарадоў, але з развіццём мабільнай сувязі тэлефонныя «будкі» сталі знікаць.
У Беларусі захавалася больш за 600 таксафонаў. Больш за ўсё іх — у Мінску.
Таксафонамі яшчэ можна скарыстацца на чыгуначным вакзале, некаторых станцыях метро, у бальніцах і навучальных установах накшталт Мінскага сувораўскага вучылішча. Некаторыя з іх працуюць як на ўваходныя, так і на выхадныя званкі.
