«Лета збірае чамаданы ў паўднёвыя краіны, і ў нашы краі накіроўваецца восень. У сувязі з гэтым у бліжэйшы час верасень паспрабуе не толькі вярнуць тэмпературны рэжым у кліматычнае рэчышча, але і пагрузіць нас у атмасферу туманаў і шэрых дажджоў. Калі ў пятніцу і выхадныя ў Беларусі пры павышаным фоне атмасфернага ціску будзе адзначацца ўмерана цёплае з кароткачасовымі дажджамі надвор’е, то на наступным тыдні асенняе сонца шчыльна зацягнуць палі франтальнай воблачнасці атлантычных цыклонаў, якія прынясуць сырое, а месцамі ветранае надвор’е, а таксама адкрыюць шлях паветраным масам са Скандынавіі (ідэальны час для гарачага чаю і дамашняй утульнасці). Таму надвор’е і прырода за акном будзе максімальна адпавядаць календару: свежа, пахмурна і дажджліва з аднаго боку, але ў той жа час неверагодна калярова і казачна прыгожа — з другога. Так, да канца бягучага тыдня (18-20 верасня) тэрыторыя Беларусі будзе знаходзіцца пад дамінуючым уплывам вобласці павышанага атмасфернага ціску, таму ападкаў чакаецца няшмат, толькі ў асобных раёнах краіны пры перамяшчэнні франтальных раздзелаў і ў няўстойлівым паветры пройдуць кароткачасовыя дажджы. Разам з тым, з прычыны адвекцыі паветранай масы ўмераных шырот, тэмпературны фон прагназуецца каля сярэдніх шматгадовых значэнняў (кліматычная норма другой дэкады верасня 11,4-14 градусаў) і ў дзённыя гадзіны будзе вагацца ад плюс 16 градусаў па поўначы, паўночным захадзе да плюс 25 градусаў па паўднёвым усходзе», — расказалі ў Белгідрамеце.