Паводле слоў Мікенаса, літоўская лагістыка будзе канчаткова знішчана пасля гэтага, калі ўлады Літвы не адкрыюць граніцу з Беларуссю. «Гэта ўдар ніжэй пояса. Палякі заўсёды так робяць. Я не ведаю, чаму Літва паступае так неразумна», — пракаментаваў сітуацыю Мікенас. 

«Вы разумееце, якую памылку дапусціла Літва, закрываючы граніцу? Цяпер грузапатокі становяцца незбалансаванымі, — абурыўся ён. — Мы ўжо шмат гадоў спрабуем зрабіць Літву транзітнай краінай. Мы ўвялі шмат тэрміналаў у Літве, а зараз нашы тэрміналы пустуюць і, паколькі граніца зачынена, грузы ідуць з Польшчы ў Азію».

У LINAVA канстатавалі, што калі Літвой не будзе знойдзены спосаб аднавіць канкурэнтную перавагу сваіх перавозчыкаў, то літоўскай лагістыцы прыйдзе канец. 

Віцэ-прэзідэнт асацыяцыі LINAVA Алег Тарасаў сказаў, што прынятыя літоўскімі ўладамі рашэнні губяць галіну. Паводле яго слоў, адкрыўшы пагранічныя пункты, Польшча павялічыць прапускную здольнасць сваёй граніцы і праз яе будзе праходзіць увесь грузапаток, што знізіць неабходнасць транспарціроўкі грузаў праз Літву або Латвію.

Ён адзначыў, што паток грузаў у Літве ўжо значна скараціўся, а пасля таго, як Польшча адкрые граніцу, яе фірмы возьмуць на сябе перавозку грузаў, якія абслугоўваюцца літоўскімі кампаніямі, у Беларусь або іншыя краіны. «Мы пакуль не ведаем, якая будзе прапускная здольнасць польскіх пунктаў пропуску, але трафік будзе праходзіць праз Польшчу вельмі хутка і аўтаматычна ўзнікае пытанне, навошта ўвогуле спатрэбяцца балтыйскія пасты?» — кажа прадстаўнік LINAVA.

У афіцыйнай заяве LINAVA, апублікаванай раней, гаварылася, што рашэнне ўрада Літвы закрыць граніцу з Беларуссю стала жорсткай эканамічнай блакадай для перавозчыкаў. У лісце LINAVA да прэм’ер-міністра Літвы Інгі Ругінене гаварылася, што сітуацыя, якая склалася, уяўляе сур’ёзную пагрозу для мноства працоўных месцаў і стабільнасці ўсяго транспартнага сектара. Прэм’ер Літвы назвала патрабаванні літоўскіх перавозчыкаў адкрыць мяжу «перабольшаным эмацыйным фонам». Яна таксама сказала, што літоўскім перавозчыкам трэба было «загадзя падрыхтавацца да такіх сітуацый» і самім «ацэньваць рызыкі». 

Згодна з праектам, падрыхтаваным МУС Польшчы, 17 лістапада плануецца адкрыць два закрытыя пункты перасячэння граніцы з Беларуссю («Баброўнікі» — «Бераставіца» і «Кузня Беластоцкая» — «Брузгі». Прэм’ер-міністр Польшчы Дональд Туск пацвердзіў, што гэтыя пераходы адкрыюцца на пачатку наступнага тыдня. Намеснік міністра ўнутраных спраў і адміністрацыі Польшчы Веслаў Шчэпаньскі заявіў сёння, што галоўная прычына адкрыцця двух пагранічных пераходаў з Беларуссю — эканамічны эфект.

29 кастрычніка ўлады Літвы на месяц закрылі аўтадарожную мяжу з Беларуссю. Рух праз пункт пропуску «Шальчынінкай» («Беняконі») быў поўнасцю прыпынены, а дзейнасць пункта пропуску «Мядзінінкай» («Каменны Лог») абмежавана выключэннямі.