У Віцебску завяршыліся міжнародныя спаборніцтвы па скачках на батуце памяці заслужанага трэнера Рэспублікі Беларусь Валерыя Вагеля, паведамляе БелТА са спасылкай на прэс-службу Беларускай асацыяцыі гімнастыкі.
Удзел у турніры прынялі каля 200 батутыстаў з Беларусі, Расіі і Азербайджана. У заключны дзень спартсмены вызначылі наймацнейшых у сінхронных скачках. Перамогу ў мужчын атрымалі беларусы Аляксей Дудараў і Мікіта Белавусаў, сярод дзяўчат лепшымі сталі нашы Віялета Бардзілоўская і Кацярына Яршова. Акрамя таго, Бардзілоўская разам з двухразовым алімпійскім чэмпіёнам Іванам Літвіновічам першынствавала ў змешаным заліку.
Усяго за чатыры дні спаборніцтваў удзельнікі мемарыяла Вагеля разыгралі медалі ў чатырох узроставых катэгорыях (да 12, да 14, да 16 і старэйшых за 16 гадоў). Беларускія батутысты ўвогуле заваявалі 40 узнагарод, з якіх 15 — залатыя.
