«Няпростая ваенна-палітычная абстаноўка цяпер складваецца. Гэта звязана ў першую чаргу з беспрэцэдэнтнай мілітарызацыяй нашых суседзяў, Еўрапейскага кантынента, далейшым прадаўжэннем ваенных канфліктаў, якія мы назіраем, пашырэннем НАТА. Нашы дзяжурныя службы практычна штодзень фіксуюць парушэнні дзяржаўнай граніцы ў паветранай прасторы», — адзначыў Андрэй Лук’яновіч.

Парушэнні абумоўлены геаграфічным становішчам краіны. «Мы маем выступы як на тэрыторыі Украіны, так і на тэрыторыі Расійскай Федэрацыі, на поўдні, на ўсходзе, — растлумачыў Андрэй Лук’яновіч. — Таму ад тых маршрутаў, якія праходзяць міма нашых граніц, бывае, беспілотныя лятальныя апараты адхіляюцца і парушаюць паветраную прастору. У тым ліку сродкі электроннай барацьбы ўплываюць на маршрут палёту. Мы гэтыя выпадкі фіксуем. Пры парушэнні дзяржаўнай граніцы пры ўваходзе ў паветраную прастору Рэспублікі Беларусь, калі паветраная цэль уяўляе сабой пагрозу нашым крытычна важным аб’ектам, гэта цэль знішчаецца».