Сустрэча кіраўнікоў дзяржаў пройдзе ў Палацы Незалежнасці ў вузкім і пашыраным фарматах, пасля чаго адбудзецца падпісанне двухбаковых дакументаў, накіраваных на пашырэнне партнёрства дзвюх дзяржаў, паведамілі ў прэс-службе кіраўніка дзяржавы. 

Аляксандр Лукашэнка і Масуд Пезешкіян, як плануецца, абмяркуюць супрацоўніцтва Беларусі і Ірана ў сферах гандлю, інвестыцый і прамысловай кааперацыі, рэалізацыю сумесных ініцыятыў у навуцы, тэхналогіях, адукацыі, а таксама ўзаемадзеянне дзяржаў у рамках міжнародных структур, у тым ліку ЕАЭС, ШАС, БРІКС, ААН.

У цэнтры ўвагі будуць і пытанні забеспячэння рэгіянальнай і міжнароднай бяспекі. 

З гісторыі пытання

Палітычнае супрацоўніцтва Беларусі і Ірана пачало свой адлік з устанаўлення дыпламатычных адносін 18 сакавіка 1993 года. 

Наша краіна адкрыла сваё пасольства ў Тэгеране 8 сакавіка 1998 года, а пасольства Ірана працуе ў Мінску з лютага 2001 года. 

Кантакты на вышэйшым і высокім узроўнях 

Краіны падтрымліваюць высокі ўзровень палітычных кантактаў. У прыватнасці, адбыліся тры візіты Прэзідэнта Рэспублікі Беларусь у Іран (1998, 2006 і 2023 гадах) і два візіты Прэзідэнта Ірана ў Беларусь (2004 і 2007 гадах). 

9 ліпеня 2015 года на палях самітаў БРІКС і ШАС ва Уфе таксама адбылася сустрэча Прэзідэнта Рэспублікі Беларусь Аляксандра Лукашэнкі з Прэзідэнтам Ісламскай Рэспублікі Іран Хасанам Раўхані. 

Кіраўнікі дзяржаў Беларусі і Ірана сустракаліся 9 чэрвеня 2018 года на саміце ШАС у Цындаа і 14 лютага 2019 года ў Сочы разам з прэзідэнтамі Расіі і Турцыі ў рамках трохбаковага саміту па крызісе ў Сірыі. 

16 верасня 2021 года адбылася сустрэча Прэзідэнта Рэспублікі Беларусь Аляксандра Лукашэнкі з Прэзідэнтам Ірана Эбрахімам Раісі на палях саміту СКД ШАС у Душанбэ і 16 верасня 2022 года ў Самаркандзе. 

24 кастрычніка 2024 года на палях саміту БРІКС у Казані Прэзідэнт Беларусі Аляксандр Лукашэнка сустрэўся з Прэзідэнтам Ірана Масудам Пезешкіянам. Кіраўнік дзяржавы яшчэ раз павіншаваў калегу з пераканаўчай і бясспрэчнай перамогай на выбарах, вынікі якіх не маглі аспрэчыць нават на Захадзе, і запрасіў наведаць у зручны час Мінск, каб абмеркаваць перспектывы супрацоўніцтва. Тым больш, што паміж бакамі ніколі не было закрытых тэм. 

Дарэчы, удзел Прэзідэнта Ірана — упершыню ў якасці прадстаўніка дзяржавы - назіральніцы пры ЕАЭС — планаваўся ў пасяджэнні Вышэйшага Еўразійскага эканамічнага савета ў Мінску, які адбыўся 27 чэрвеня бягучага года. Аднак з прычыны пэўных абставінаў ён не змог прыляцець у беларускую сталіцу. 

«Нядаўнія ўдары па ядзерных аб’ектах Ірана, якія знаходзяцца пад кантролем МАГАТЭ, самым небяспечным чынам парушаюць палажэнні міжнароднага права, уключаючы Дагавор аб нераспаўсюджванні ядзернай зброі і Жэнеўскія канвенцыі 1949 года. Не буду нават казаць пра пачуцці, якія такія дзеянні выклікаюць у Беларусі — краіне, найбольш пацярпелай ад аварыі на Чарнобыльскай атамнай станцыі. Тады радыеактыўныя ападкі былі зафіксаваны нават у Вялікабрытаніі, Германіі і Швецыі. Думаюць, напэўна, што цяпер не накрые. Асабліва краіну, якая здзейсніла падобныя дзеянні, — адзначыў тады кіраўнік дзяржавы і пажадаў іранскаму калегу ўсялякіх поспехаў, а народу Ірана — пераадолення ўзніклых праблем. — Я хачу, каб вы ведалі, што ў вашым супраціўленні вы не ў адзіноце».

На пасяджэнні Вышэйшага Еўразійскага эканамічнага савета Аляксандр Лукашэнка таксама выказаў задавальненне ад уступлення ў сілу ў бягучым годзе поўнамаштабнага пагаднення ЕАЭС аб свабодным гандлі з Іранам.

Кантакты падтрымліваліся і на ўзроўні ўрадаў, парламентаў, міністэрстваў і ведамстваў. Дзейнічаюць Міжпарламенцкая група сяброўства Беларусі і Ірана, змешаная беларуска-іранская камісія па пытаннях эканамічнага супрацоўніцтва. Апошняя, 17-я па ліку, дарэчы, адбылася адносна нядаўна — у студзені бягучага года ў Мінску быў узгоднены План далейшага супрацоўніцтва на 2025 год па перспектыўных кірунках. 

У прэамбуле дакумента бакі зафіксавалі яго галоўную мэту: паглыбленне ўсяго комплексу гандлёва-эканамічных адносін паміж Рэспублікай Беларусь і Ісламскай Рэспублікай Іран.

Згодна з пратаколам, прыярытэтнымі задачамі для развіцця гандлёва-эканамічнага супрацоўніцтва вызначаны: рэгулярнае правядзенне пасяджэнняў камісіі; павелічэнне двухбаковага тавараабароту ў мэтах забеспячэння ўсебаковага і ўстойлівага эканамічнага развіцця паміж дзвюма краінамі; пашырэнне дыяпазону ўзаемнага гандлю таварамі і іншыя.

Дакумент уключае ўзаемадзеянне ў 2025 годзе па шырокім спектры кірункаў, у тым ліку ў сферы гандлю і прамысловасці, сельскай гаспадаркі, электраэнергетыкі, транспарту, аховы здароўя, адукацыі, спорту і іншых.

Што датычыцца міжрэгіянальнага ўзаемадзеяння, пабрацімскія сувязі ўстаноўлены паміж гарадамі-сталіцамі Мінскам і Тэгеранам, Гомельскай вобласцю і правінцыяй Мазендаран, Магілёвам і Тэбрызам.