Сусветныя гульні качэўнікаў — гэта міжнародны рух, створаны для захавання і папулярызацыі этнічных відаў спорту і культурных практык качавых народаў Цэнтральнай Азіі. Першыя Гульні адбыліся ў 2014 годзе ў Кыргызстане. З таго часу фармат спаборніцтваў перарос з рэгіянальнай падзеі ў маштабную міжнародную платформу міжкультурнага дыялогу, атрымаўшы прызнанне ААН.

У турнірах і фестывалях Сусветных гульняў качэўнікаў рэгулярна бяруць удзел дэлегацыі з дзясяткаў краін свету. У гэтым годзе чакаецца ўдзел каля 4 тыс. атлетаў і прадстаўнікоў 90 краін. Дэлегацыю Беларусі ўзначаліў намеснік міністра спорту Аляксандр Барауля. У склад беларускай зборнай увайшлі спартсмены, якія выступаюць у спаборніцтвах па самба, барацьбе на паясах і армрэслінгу.

Мерапрыемства ўключае не толькі спаборніцтвы па традыцыйных качавых відах спорту, але і дэманстрацыю рамёстваў і этнакультурныя праграмы. На Гульнях таксама праходзяць парады каманд, майстар-класы па рамёствах, выставы нацыянальнай кухні і фальклорныя паказы.

Калі казаць пра спартыўны складнік, то асноўнымі дысцыплінамі з’яўляюцца конныя гульні, гонкі і паядынкі, паясная барацьба, паляванне з лоўчымі птушкамі, стральба з лука, спаборніцтвы па зборцы юрт, настольныя і народныя гульні і інш.