«Гэта рашэнне да панядзелка я абавязаны прыняць. Цягнуць не трэба, не трэба, каб быў бюракратызм або валакіта. Гэта мой прынцып: я чалавек сістэмны, і хачу гэта вырашыць за выхадныя», — заявіў Аляксандр Лукашэнка. 

Беларускі лідар нагадаў, што раней да яго пісьмова звярталіся прадстаўнікі літоўскіх і польскіх аўтаперавозчыкаў. Аляксандр Лукашэнка даручыў кіраўніцтву ўрада правесці з імі сустрэчу. «Я даручыў ураду: давайце вы сустрэнецеся і па-чалавечы з імі пагаворыце. Селі за стол перагавораў, выслухалі іх і перадалі мне. Я прыму рашэнне і, думаю, з панядзелка гэты працэс вяртання гэтых фур пачнём. Вернем гэтыя фуры. Шкада палякаў, літоўцаў», — сказаў кіраўнік дзяржавы.

Пры гэтым, адзначыў ён, для аўтаперавозчыкаў можа быць зніжана цана за ахову фур, якая першапачаткова складала 120 еўра ў суткі. 

Як паведамлялася раней, з-за палітычна матываваных рашэнняў уласных улад, уключаючы абмежаванні на транзіт і закрыццё пунктаў пропуску, каля тысячы грузавікоў з літоўскай рэгістрацыяй аказаліся заблакіраваныя і пазбаўленыя магчымасці паўнавартасна працаваць на звыклых напрамках. Беларускі бок цягам чатырох месяцаў шматразова спрабаваў развязаць праблему з фурамі з літоўскай рэгістрацыяй палітыка-дыпламатычнымі спосабамі, але Вільнюс не ішоў на дыялог.