Кіраўнік дзяржавы ў Шклоўскім раёне наведвае «АСБ-Агра Гарадзец», дзе яму даложаць аб рабоце і перспектывах развіцця гэтага сельгаспрадпрыемства. Папярэдні раз Аляксандр Лукашэнка быў тут з рабочай паездкай у верасні 2025 года. Тады ён крытычна ацаніў убачанае і запатрабаваў навесці ідэальны парадак на ўсіх аб’ектах прадпрыемства, уключаючы машынны двор, малочнатаварны комплекс і сельскагаспадарчыя ўчасткі. «Тут ёсць магчымасць для таго, каб мець добрую гаспадарку, — падкрэсліў ён. — Не будзе дысцыпліны — нічога не будзе».

У маі 2026 года акцыі ЗАТ «АСБ-Агра Гарадзец» былі перададзены ў гаспадарчае вядзенне РУП «Магілёўаблгаз». Была распрацавана комплексная праграма мадэрнізацыі сельгаспрадпрыемства на 2026-2027 гады з аб’ёмам фінансавання каля 86,5 млн рублёў.

Праграмай прадугледжана ўзвядзенне мехмайстэрняў з дапаможнымі памяшканнямі, мадэрнізацыя склада для захоўвання мінеральных угнаенняў, узвядзенне прафілакторыя для цялят, сіласных траншэй, рэканструкцыя фермы па адкорме маладняку БРЖ.

Акрамя таго, узводзіцца ферма па развядзенні племянной жывёлы мясных парод на 800 галоў. Большая частка работ ужо выканана. Цяпер на ферму паступіла 235 галоў маладняку герэфордскай пароды для фарміравання племяннога мяснога статка. Мяса кароў гэтай пароды валодае выяўленай «мармуровасцю» і насычанымі смакавымі якасцямі.

Прэзідэнт азнаёміцца з работай фермы па развядзенні БРЖ герэфордскай пароды, а таксама мехмайстэрняў, якія рэканструююцца.

Аляксандр Лукашэнка арыентуе на будаўніцтва па краіне невялікіх ферм па адкорме буйной рагатай жывёлы мясных парод. Размова перш за ўсё аб аддаленых тэрыторыях у раёнах, дзе нерэнтабельна займацца малочным напрамкам, але кармавая база дае магчымасць утрымліваць параўнальна невялікае мясное пагалоўе.

«Нам давядзецца гэта рабіць. У Віцебскай вобласці абавязкова», — сказаў кіраўнік дзяржавы.

Ён упэўнены, што шмат такіх тэрыторый ёсць і ў Магілёўскай, Мінскай абласцях, а часткова і ў іншых рэгіёнах. Адпаведна, для напаўнення такіх ферм трэба развіваць у краіне племянную жывёлагадоўлю.

«І будаваць у такіх „цёмных“ месцах. Трэба варушыцца. Трэба рабіць хутка гэта ўсё», — падкрэсліў беларускі лідар.

Ён растлумачыў, што на невялікіх тэрыторыях, аддаленых ад цэнтраў гаспадарак, з пункту гледжання і лагістыкі, і эканомікі часта нерэнтабельна ўтрымліваць малочнатаварны комплекс. Ды і для яго ў большым аб’ёме патрэбны працоўныя рэсурсы. Але ёсць магчымасць развіваць мясны напрамак, які асабліва зараз мае добры экспартны патэнцыял і прыносіць прыбытак.

«Там 200 гектараў зямельныя ўгоддзі. 200 га могуць пракарміць 100 галоў. Вось узялі і паставілі гаспадарку з усім шлейфам», — прывёў прыклад кіраўнік дзяржавы.

«Нам трэба разумна падыходзіць да таго, дзе што рабіць. І рабіць капітальна і тэхналагічна», — патрабуе Аляксандр Лукашэнка.

Адным з пунктаў праграмы стала будаўніцтва фермы па развядзенні племянной жывёлы мясных парод на 800 галоў ЗАТ «ААБ-Агра Гарадзец». Аляксандр Лукашэнка азнаёміўся з новым аб’ектам.

Цяпер на ферму паступіла 235 галоў маладняку герэфордскай пароды для фарміравання племяннога мяснога статка. Мяса кароў гэтай пароды валодае выяўленай «мармуровасцю» і насычанымі смакавымі якасцямі.

«Чаму мы глядзім гэты фактычна комплекс па адкорму — таму што так трэба будзе рабіць у многіх галінах», — акцэнтаваў увагу кіраўнік дзяржавы.

Кіраўнік дзяржавы крытычна заўважыў у адрас кіраўнікоў, што работы па мадэрнізацыі прадпрыемства былі пачаты толькі пасля яго даручэння. «У гэтым і ўся наша бяда, і нашы праблемы — без даручэння мы нічога не робім», — адзначыў ён.

Аляксандр Лукашэнка падкрэсліў важнасць падтрымання не толькі працоўнай дысцыпліны, але і дысцыпліны разлікаў з добрасумленнымі работнікамі. Людзі павінны разумець, што іх даход напрамую залежыць ад укладзенай працы. «Усе разгільдзяі і п’яніцы павінны бачыць — хто працуе, той і зарабляе», — падкрэсліў беларускі лідар.

Ён таксама нагадаў, што ў прыняцці рашэнняў па развіццю сельгаспрадпрыемства, стварэнню тых ці іншых аб’ектаў важна класці ў аснову як эканоміку вытворчасці, так і арыентавацца на мясцовыя рэаліі, жыццё людзей.

Мадэрнізацыя ў ЗАТ «ААБ-Агра Гарадзец» — адна з частак агульнага плана па развіццю Шклоўскага раёна. «Ён павінен быць калі не ўзорам, то прыкладам, у якім напрамку раёны павінны развівацца», — сказаў кіраўнік дзяржавы. Адпаведныя падыходы будуць у бліжэйшы час абмеркаваны на семінары з удзелам Прэзідэнта.

Аляксандр Лукашэнка асабліва падкрэсліў, што ў сельскай гаспадарцы не павінна быць утрыманскага падыходу. Трэба глядзець, каго падтрымліваць, а каго не.

«Грошы трэба ўкладваць, каб была аддача», — патрабуе Прэзідэнт.

Кіраўнік дзяржавы ў цэлым хоча даць сур’ёзны штуршок развіццю сельгасвытворчасці на ўсходзе краіны — у Віцебскай, Магілёўскай і Гомельскай абласцях. «Мы ўжо ўсё вам паказалі, як трэба. Будзем патрабаваць. Грошы ўклалі немалыя — патрэбны вынік», — сказаў ён.