«Самае важнае, гэта датычыцца краіны ў цэлым, каб гэта былі апорныя пункты для нашых заводаў», — сказаў Прэзідэнт.

 
Ён адзначыў, што ўсё павінна быць па аналогіі з тым, як абслугоўваюць айчынную тэхніку ў мультыбрэндавых цэнтрах за мяжой.

 

«Заводы павінны разумець, што гэта і іх справа. Прадалі сюды тэхніку — будзьце ласкавы абслугоўваць яе тут», — падкрэсліў беларускі лідар.

Аляксандр Лукашэнка адзначыў, што ў падобных райаграсэрвісах, як рэканструяваны ў Шклове, у роўнай ступені трэба абслугоўваць і іншую тэхніку, не толькі айчынных вытворцаў. Адпаведна, трэба мець запас неабходных запчастак, адпрацаваную схему выканання работ і, што немалаважна, прымальныя цэны на паслугі.

«Цэны павінны быць пад кантролем як мінімум старшыні райвыканкама. Цэны павінны быць не стратныя», — сказаў Аляксандр Лукашэнка.

 

Кіраўнік дзяржавы адзначыў ашаламляльныя змены, якія адбыліся на тэрыторыі аграсэрвісу за год з пачатку рэканструкцыі.

Аляксандр Лукашэнка яшчэ раз растлумачыў, чаму гэты і іншыя праекты рэалізуюцца менавіта ў Шклоўскім раёне: «Гэта не таму што я тут працаваў і гэта мая Радзіма. Таму што я тут усё ведаю да кожнага метра. Таму мы робім такі ўзорны раён тут у Шклове і збольшага ў Оршы».

 

Што датычыцца райаграсэрвісу, Прэзідэнт звярнуў увагу, што перш ён быў сярэднім або нават крыху ніжэйшым у параўнанні з іншымі падобнымі арганізацыямі.

«Нам трэба тут зрабіць узорную тыповую сельгастэхніку-райаграсэрвіс у Шклове, каб паказаць усім, як трэба, — падкрэсліў кіраўнік дзяржавы. — Па буйным усё зроблена. Засталася драбніца. Трэба прывесці гэта ўсё ў парадак».

Плануецца, што восенню на базе гэтага ўзорнага райаграсэрвісу ў Шклове правядуць семінар, на які запросяць старшыняў райвыканкамаў.

 

Кіраўнік дзяржавы ацаніў праведзеную рэканструкцыю, наведаў рамонтную майстэрню. «Для нас гэта цуд у тым плане, калі мы зробім такія рамонтныя майстэрні (у іншых раёнах. — Заўв. БелТА)», — падкрэсліў беларускі лідар.

Праектам займалася Кіраўніцтва справамі Прэзідэнта. «Зрабіў добра», — адзначыў Аляксандр Лукашэнка, звяртаючыся да кіраўніка спраў Прэзідэнта Юрыя Назарава.

Цяпер, сказаў Прэзідэнт, гэты падарунак для раёна трэба растыражаваць у маштабах краіны.

 

Кіраўнік дзяржавы звярнуў увагу, што падобныя рамонтныя арганізацыі, разам з будаўнічымі ПМК і іншымі ўстановамі, з’яўляюцца базавымі для кіраўнікоў раёнаў, каб мець магчымасць эфектыўна выбудоўваць работу.

Да пачатку рэканструкцыі на тэрыторыі аграсэрвісу знаходзілася амаль два дзясяткі будынкаў і збудаванняў 1950-1975 гадоў пабудовы. Было прынята рашэнне аб зносе часткі з іх і стварэнні на гэтай тэрыторыі сучаснай рамонтнай арганізацыі раённага ўзроўню, якая б задавала стандарты ў развіцці падобных арганізацый па ўсёй краіне.

 

Рэканструкцыя майстэрняў, распачатая ў красавіку 2025 года, на бягучы момант практычна завершана. Цэнтральная рамонтная майстэрня прызначана для капітальнага рамонту энерганасычаных трактароў, кормаўборачных, збожжаўборачных машын і іншай сельгастэхнікі. Ёсць таксама абменны пункт для захоўвання вузлоў і агрэгатаў, станцыя тэхнічнага абслугоўвання легкавых аўтамабіляў.

Праведзеная рэканструкцыя дазволіла стварыць сучасны цэнтр па абслугоўванні сельскагаспадарчай тэхнікі і абсталявання жывёлагадоўчых комплексаў (даільныя залы, халадзільнае абсталяванне).

 

Яшчэ да завяршэння рэканструкцыі з мая 2026 года ў майстэрнях пачалі ажыццяўляць рамонт сельгастэхнікі шэрагу мясцовых гаспадарак. Для зніжэння выдаткаў праводзяцца цэнтралізаваныя закупкі запасных частак непасрэдна ў заводаў-вытворцаў. Пасля праходжання атэстацыі майстэрняў будуць заключаны дагаворы на сэрвіснае абслугоўванне тэхнікі.