«Для прыняцця рашэнняў практычна пытанняў няма. Урады добра працуюць», — сказаў кіраўнік дзяржавы.

Месцам правядзення сустрэчы кіраўнікоў дзяржаў стала падмаскоўная дзяржаўная рэзідэнцыя «Нова-Агарова».

Кіраўнік дзяржавы адзначыў, што напярэдадні ў Маскве ў яго адбылася прадуктыўная сустрэча са старшынёй урада Расіі Міхаілам Мішусціным. «Мы з Міхаілам Уладзіміравічам, вы ў курсе справы, сістэмна і ўсеабдымна прапрацавалі ўвесь пералік (пытанняў. — Заўв. БелТА). Прытым ініцыятарам быў не я, а Міхаіл Уладзіміравіч. Ён дастаў свой нататнік і перачытаў, пералічыў усе гэтыя праблемы, пытанні. Мы іх прааналізавалі. Добрая адбылася размова. Я нават падзякаваў яму за тое, што мы змаглі сустрэцца. Менш будзе нам працы, — сказаў Прэзідэнт Беларусі. — У нас такі сёння дзень падвядзення некаторых вынікаў, а не прыняцця рашэнняў, я думаю».

Аляксандр Лукашэнка канстатаваў, што тавараабарот Беларусі і Расіі расце і ў бягучым годзе. «Як мінімум на 12%. Мы перасягнем — і значна — узровень мінулага года ў нашым тавараабароце. Прыемна, што ў гэтым тавараабароце вялікае месца займае сучасная электроніка», — адзначыў ён.

«Што датычыцца бягучых пытанняў, мы свята выконваем усе нашы дамоўленасці, пачынаючы ад сельскай гаспадаркі, харчавання, паліва», — падкрэсліў беларускі лідар.

Гаворачы аб рэгулярнасці беларуска-расійскіх кантактаў, у тым ліку на вышэйшым узроўні, Аляксандр Лукашэнка патлумачыў гэта не толькі жаданнем лідараў дзвюх краін. «Дынаміка міжнародных адносін такая, што яна нас у тым ліку падштурхоўвае да таго, каб абмяркоўваць тыя праблемы, якія перад намі стаяць. Што мы разам будзем, супрацоўнічаючы, пераадольваць усякія цяжкасці, вы ў гэтым можаце нават не сумнявацца. Я пра гэта гаварыў не адзін раз, сустракаючыся з прадстаўнікамі расійскага бізнесу, кіраўніцтвам абласцей, рэгіёнаў», — сказаў Прэзідэнт Беларусі.