Размова зайшла і аб тым, каб больш шырока выкарыстоўваць беларускую бульбу ў арганізацыях грамадскага харчавання, у тым ліку ў сетцы «Мак.бай». Прэзідэнт нагадаў, што ранейшыя ўладальнікі ўцяклі з Беларусі і дзяржаве прыйшлося ўмяшацца, каб сетка працягнула працаваць. «Я кажу: бог з вамі, вы ж „Макдональдс“ гэты не панясеце? 27 пунктаў — не павязеце. Ну і едзьце. Узяў на кантроль, — нагадаў, як гэта было, Прэзідэнт. — Сёння мне кажуць: чэргі стаяць. Абышліся. У нас разумныя людзі».

Першапачаткова пасля гэтага рашэння ўзнікалі некаторыя складанасці з пастаўкай інгрэдыентаў для прыгатавання асобных страў. Напрыклад, патрабаваліся пэўнай рэцэптуры катлеты для бургераў, сарты бульбы для прыгатавання яе ў фрыцюры і гэтак далей. Кіраўнік дзяржавы арыентаваў на тое, каб у максімальнай ступені выкарыстоўваць айчынныя харчовыя прадукты, тым больш што краіна славіцца сваімі якаснымі і смачнымі прадуктамі, вырабляе іх у дастатковай колькасці.

Зараз імпартазамяшчэнне ажыццёўлена прыкладна на 84 %. «Там павінна быць беларускае», — паставіў задачу Аляксандр Лукашэнка. Ён падкрэсліў, што для прыгатавання бульбы фры павінны выкарыстоўваць на 100 % айчынную бульбу. Прэзідэнта запэўнілі, што ўжо цяпер у гэтай сетцы гатуюць усё з беларускай сыравіны, у тым ліку і бульбу фры, і катлеты для «Біг-Макаў». З імпартнага - толькі булачка, але і яе вось-вось пачнуць выпякаць у краіне, такім чынам закрыўшы пакінутыя 16 %. Плануецца, што адпаведная пякарня пачне працаваць з лютага, і тады меню "Мак.бай" стане на 100 % сваё, беларускае. 

Аляксандр Лукашэнка расказаў, што яму было б цікава наведаць гэту сетку, але зробіць ён гэта пры адной умове — калі там яго пачастуюць стравай, зробленай на 100 % з беларускіх прадуктаў. Прэзідэнт прызнаўся, што ні разу не спрабаваў тое, што прапануецца ў меню «Мак.бай». Хоць некаторыя іншыя замежныя лідары аддаюць перавагу менавіта такой ежы. Напрыклад, прэзідэнт ЗША Дональд Трамп так любіць біг-макі, што за ім паўсюль ездзіць спецыяльны фургон, дзе іх гатуюць.