Гэта рашэнне прынята кіраўніком дзяржавы зыходзячы з прынцыпаў гуманнасці і з улікам жыццёвай сітуацыі асуджанай (жанчына цяжарная). Прымаліся да ўвагі яе асабісты зварот да Прэзідэнта з хадайніцтвам аб памілаванні, дзейнае раскаянне і паводзіны падчас адбывання пакарання, паведамілі ў прэс-службе беларускага лідара.
Прэзідэнт Беларусі ў выключных выпадках прымае індывідуальныя рашэнні аб памілаванні. Аб гэтым расказала журналістам намеснік кіраўніка Адміністрацыі Прэзідэнта Вольга Чупрыс, каменціруючы чарговы падпісаны ўказ аб памілаванні, паведамляе БелТА.
Вольга Чупрыс растлумачыла, што злачынствы былі звязаны з фінансаваннем дзейнасці экстрэмісцкіх фарміраванняў, шэраг з якіх адносіцца да катэгорыі ўзброеных. «Наталля звярнулася з хадайніцтвам аб памілаванні да кіраўніка дзяржавы, у якім шчыра раскайвалася ва ўчыненых злачынствах і прасіла праявіць літасць, вызваліўшы яе ад адбывання далейшага пакарання ў выглядзе пазбаўлення волі, бо цяпер яна знаходзіцца ў стане цяжарнасці і чакае ў хуткім часе нараджэння дзіцяці», — расказала Вольга Чупрыс, якая таксама ўзначальвае Камісію па пытаннях памілавання пры Прэзідэнце Беларусі.
Паводле слоў Вольгі Чупрыс, у хадайніцтве аб памілаванні Наталля Левая выказала бачанне свайго будучага знаходжання ў Беларусі, указаўшы на тое, што «хоча жыць і выхоўваць сваё будучае дзіця ў нашай цудоўнай, мірнай, квітнеючай краіне». Жанчына таксама ўказала, што гатова весці законапаслухмяны лад жыцця.
Адпаведнае хадайніцтва з неабходным пакетам дакументаў было неадкладна накіравана кіраўніку дзяржавы.
«Нягледзячы на тое, што злачынства адносіцца да катэгорыі цяжкіх і асуджаная адбыла менш як палавіну тэрміну назначанага пакарання, кіраўніком дзяржавы прынята станоўчае рашэнне», — адзначыла намеснік кіраўніка Адміністрацыі Прэзідэнта.
Пры гэтым жанчына памілаваная пры ўмове правапаслухмяных паводзін. Гэта азначае, што калі яна ў далейшым парушыць нормы крымінальнага заканадаўства, то будзе вернутая ў месцы пазбаўлення волі.
«Такі ўчынак кіраўніка дзяржавы сведчыць аб яго міласэрным удзеле ў лёсе самой асуджанай і яе сям’і. Прэзідэнт усе хадайніцтвы, якія паступаюць на яго імя ад асуджаных, разглядае ўважліва і з асаблівай увагай», — падкрэсліла Вольга Чупрыс.
Яна адзначыла, што кіраўніком дзяржавы сфарміраваны дзве камісіі, якія ўносяць яму неабходныя прапановы па адпаведных пытаннях. «Напрыклад, толькі за папярэдні год на падставе ўнесеных прапаноў кіраўніком дзяржавы памілаваны 352 чалавекі».
Аднак кіраўнік дзяржавы можа прымаць і індывідуальныя рашэнні ў выключных выпадках, улічваючы асаблівыя жыццёвыя абставіны, стан здароўя і кіруючыся прынцыпам гуманізму. Такое рашэнне і было прынятае, калі ён падпісаў указ, памілаваўшы цяжарную Наталлю Левую", — сказала намеснік кіраўніка Адміністрацыі Прэзідэнта.
