Прэзідэнт Беларусі Аляксандр Лукашэнка 22 красавіка падпісаў Указ № 136 «Аб аўтамабільных перавозках пасажыраў у нерэгулярных зносінах», якім удасканальваецца прававое кіраванне гэтай сферай. Пра гэта БелТА паведамілі ў прэс-службе кіраўніка дзяржавы.
Згодна з дакументам, дапаўняецца пералік звестак, якія падлягаюць уключэнню ў рэестр аўтамабільных перавозак пасажыраў у нерэгулярных зносінах. Пры іх адсутнасці транспартная дзейнасць прызнаецца незаконнай.
Прадугледжваюцца новыя падставы для прыпынення работы аўтамабільных перавозчыкаў: непрадастаўленне падатковай дэкларацыі, наяўнасць запазычанасці па выплаце падаткаў, прадастаўленне ў падатковыя органы недакладных звестак і іншае. Гэтыя меры накіраваны на спыненне дзейнасці арганізацый-аднадзёнак.
Указам уводзіцца забарона на выкарыстанне транспартных сродкаў аўтаперавозчыка, выключанага з рэестра за парушэнні, усімі іншымі перавозчыкамі. Паўторнае ўключэнне ў яго магчыма па заканчэнні трох месяцаў.
Акрамя таго, пашыраецца пералік перавозак, на якія не распаўсюджваецца дзеянне ўказа ад 25 студзеня 2024 года № 32 «Аб аўтамабільных перавозках пасажыраў».
Рэалізацыя ўказа № 136 дасць магчымасць павысіць бяспеку і сфарміраваць празрыстае падатковае асяроддзе ў сферы перавозак пасажыраў у нерэгулярных зносінах.
