Кіраўнік дзяржавы звярнуў увагу, што ў Беларусі развіваюць апорныя сельскія населеныя пункты — аграгарадкі і буйныя вёскі. Рамантуюць і будуюць новыя дарогі, пастаянна павышаюць патрабаванні да гандлёвага абслугоўвання на вёсцы.

Прэзідэнт упэўнены, што ў будучыні якраз аграгарадкі і буйныя вёскі (былыя цэнтры калгасаў і саўгасаў) застануцца і будуць развівацца. Для гандлю зручна, што яны знаходзяцца ў асноўным паблізу буйных дарог. А вось маленькія вёсачкі, магчыма, часткова знікнуць і пераўтворацца ў нейкія іншыя фарматы.

Адзін з іх — такі модны сучасны кірунак, як «избинг». Ён ужо атрымаў распаўсюджанне ў Беларусі, але ў асноўным пакуль за кошт расіян. Хоць Аляксандр Лукашэнка, звяртаючыся да беларусаў, якія жывуць у гарадах, даўно заклікае набываць пустуючыя дамы, участкі ў невялікіх населеных пунктах, далей ад гарадской мітусні, дзе ёсць магчымасць і на зямлі папрацаваць, басанож пахадзіць, і дзяцей аздараўляць, прывучаць іх да фізічнай актыўнасці. «Месцаў свабодных хапае», — заўважыў ён.

«Аказваецца, расіяне — яны Бацьку пачулі: скупляюць вось гэтыя ўчасткі. Тым больш у Беларусі развітая сістэма дарог чыгунак, аўтамабільных — усё ёсць. І яны пустыя хаты скупляюць, рамантуюць, у парадак прыводзяць, дзесьці зносяць, — сказаў Прэзідэнт. — А беларусы мяне не чуюць».

«Глядзіце, беларусы, прыйдзе час, будзеце рукамі разводзіць, але будзе позна», — папярэдзіў кіраўнік дзяржавы.