Кіраўнік дзяржавы заўважыў, што кандыдатуру Паўла Муравейкі на гэтую пасаду яму ніхто не рэкамендаваў, гэта была яго асабістая прапанова і рашэнне, збольшага нечаканае як для цяперашняга кіраўніцтва Адміністрацыі Прэзідэнта, так і для Дзяржсакратарыята Савета Бяспекі, вайскоўцаў. «Таму будзьце вольныя ад усіх», — сказаў Аляксандр Лукашэнка.

Ён падкрэсліў, што гэта кадравае рашэнне накіравана на тое, каб атрымаць альтэрнатыўны пункт гледжання на сітуацыю ва Узброеных Сілах ад граматнага, прафесійнага чалавека. «Альтэрнатыўны, канкурэнтны пункт гледжання павінен існаваць на самым высокім узроўні. Гэта мне трэба. Я хачу, каб нашы Узброеныя Сілы былі гатовыя да самых сур’ёзных сутыкненняў, мерапрыемстваў, каб іх пазбегнуць, — заявіў кіраўнік дзяржавы. — Наша мэта адна — абараніць той кавалак зямлі, на якім мы жывём».