Кіраўнік дзяржавы адзначыў, што за мінулы перыяд завод стаў адным з флагманаў айчыннага машынабудавання і заваяваў лідарскія пазіцыі не толькі ў Беларусі, але і на прасторы СНД.

«Магілёўскія ліфты і надзейнае інавацыйнае абсталяванне для камфортнага гарадскога асяроддзя забяспечваюць бяспеку і зручнасць мільёнаў людзей у жылых і адміністрацыйных будынках розных краін, дзякуючы чаму прадпрыемства ўпэўнена глядзіць у будучыню», — гаворыцца ў віншаванні.

Разам з тым, як падкрэсліў Прэзідэнт, галоўнае багацце завода — унікальны калектыў: таленавітыя інжынеры, канструктары, майстры і рабочыя. Асаблівыя словы ўдзячнасці Аляксандр Лукашэнка адрасаваў ветэранам, якія ўзводзілі індустрыяльны гігант, заклалі моцныя працоўныя дынастыі і змаглі перадаць пераемнікам найбагацейшы вопыт. «Прыемна, што цяперашняе пакаленне завадчан, беражліва захоўваючы слаўныя традыцыі, няўхільна імкнецца да новых прафесійных вяршынь», — адзначыў кіраўнік дзяржавы.

Прэзідэнт перакананы, што работнікам прадпрыемства па сілах вырашыць самыя складаныя задачы і рэалізаваць амбіцыйныя планы ў імя Беларусі і яе народа. 

Аляксандр Лукашэнка пажадаў калектыву «Магілёўліфтмаша» добрага здароўя, невычэрпнай энергіі і далейшых вытворчых поспехаў.