Ад Прэзідэнта Беларусі Аляксандра Лукашэнкі ў «Раўбічах» беларускім біятланістам перададзены пачастункі, у тым ліку сала, хлеб і прэзідэнцкія напіткі, паведамляе БелТА.
«Допінг» ад Першага нашым біятланістам-чэмпіёнам», — піша Telegram-канал «Пул Першага».
«Самая ганаровая місія, з якой мы сёння прыехалі, каб сустрэцца, пагаварыць з вамі і перадаць словы падзякі і яшчэ раз віншаванні ад Прэзідэнта. Вам ад яго вялікае прывітанне. Натуральна, пажаданні далейшых поспехаў. Нягледзячы ні на што, насуперак усяму. А калі-небудзь... Я ўпэўнена, што Прэзідэнт верыць, — калі-небудзь мы дажывём да таго моманту, калі будзе «дзякуючы», — звярнулася да біятланістаў прэс-сакратар Прэзідэнта Беларусі Наталля Эйсмант.
Уручаючы пачастункі ад кіраўніка дзяржавы, яна сказала: «Прэзідэнт лічыць так: калі можа існаваць у спартыўным свеце допінг, то ён павінен быць толькі такім».
«Дзякуй вам вялікі. У тым ліку і ад усіх беларускіх балельшчыкаў. Думаю, што вы лепш за ўсіх ведаеце, як беларусы любяць біятлон. Поспехаў вялікіх! Будзем за вас хварэць і перажываць як заўсёды», — дадала Наталля Эйсмант.
Сярод пачастункаў ад Прэзідэнта — сала, хлеб, мёд, прысмакі, набор беларускіх прадуктаў.
Акрамя Наталлі Эйсмант на цырымоніі прысутнічалі міністр спорту Сяргей Кавальчук і памочнік Прэзідэнта Мікалай Латышонак.
Біятланіст Антон Смольскі ад імя членаў каманды падзякаваў кіраўніку дзяржавы за пільную ўвагу, якую ён праяўляе да гэтага віду спорту, а таксама за падтрымку. «Падтрымлівае нас, перажывае за нас, кажа нам словы на дарогу, якія, я ўжо гаварыў, выраўноўваюць паставу і матывуюць да перамог. Таму вялікая падзяка за тое, што ён сочыць за намі, хвалюецца, хварэе за нас», — сказаў спартсмен.
Як паведамлялася БелТА, на этапе Кубка Садружнасці па біятлоне, які прайшоў у «Раўбічах», беларускія спартсмены заваявалі шэраг узнагарод, у тым ліку вышэйшай пробы. У заключны дзень спаборніцтваў Антон Смольскі, Сцяпан Данілаў, Ганна Сола і Дзінара Смольская сталі пераможцамі ў змешанай эстафеце, з чым іх павіншаваў кіраўнік дзяржавы.
Да гэтага Антон Смольскі стаў залатым прызёрам у гонцы праследавання, а таксама ўзяў бронзу ў спрынце. Акрамя таго, у скарбонцы беларускіх біятланістаў серабро ў гонцы праследавання, якое заваявала Ганна Сола.
