Даверчыя граматы кіраўніку дзяржавы ўручылі дыпламаты з Узбекістана, Бразіліі, Перу, Манголіі, М'янмы, Рэспублікі Карэя, Саудаўскай Аравіі, Лівіі, Руанды.

Прэзідэнт павіншаваў паслоў з афіцыйным пачаткам дыпламатычнай місіі і выказаў упэўненасць, што яна будзе насычанай значнымі падзеямі і канкрэтнымі справамі.

Лукашэнка: Беларусь па праве лічыць сябе часткай глабальнай большасці

Прэзідэнт павіншаваў паслоў з афіцыйным пачаткам дыпламатычнай місіі і выказаў упэўненасць, што яна будзе насычанай значнымі падзеямі і канкрэтнымі справамі. «Любыя прапановы, накіраваныя на развіццё дружалюбных, добрых сувязяў паміж вашымі краінамі і Беларуссю, будуць аператыўна і ўважліва разглядацца, — запэўніў кіраўнік дзяржавы. — Мы гатовыя да нацэленага на вынік узаемадзеяння». Аляксандр Лукашэнка заўважыў, што паспяховая дзейнасць дыпламатаў залежыць не толькі ад іх намаганняў, але і ад крокаў беларускага боку. «Але мы свой шлях пройдзем заўсёды годна», — падкрэсліў беларускі лідар.

Звяртаючыся да дыпламатаў, Прэзідэнт адзначыў, што многія з іх прадстаўляюць дзяржавы глабальнай большасці, роля якой у міжнародных справах імкліва і, галоўнае, заслужана расце. «Краіны, якія ўваходзяць у яе, маюць падобныя падыходы да светабудовы, выбудоўвання партнёрства, урэгулявання канфліктаў. Ім уласцівыя павага да нацыянальнага суверэнітэту, непрыманне ціску, дыктату, незаконных санкцый. Беларусь па праве лічыць сябе часткай гэтай глабальнай большасці», — падкрэсліў ён.

«Наша гісторыя, гераічны і адначасова трагічны вопыт супрацьстаяння шматлікім спробам каланізацыі і знішчэння беларусаў прадвызначылі выключную важнасць для нас незалежнасці і права „людзей звацца“, як сказаў беларускі класік», — заявіў кіраўнік дзяржавы.

Аляксандр Лукашэнка ўпэўнены, што агульнасць поглядаў краін глабальнай большасці будзе добрым падмуркам і для паспяховай місіі дыпламатаў у Беларусі. 

Яркім сімвалам гасціннасці Беларусі Прэзідэнт назваў фестываль мастацтваў «Славянскі базар у Віцебску», удзельнікамі якога за 35-гадовую гісторыю былі прадстаўнікі 85 краін, у тым ліку Узбекістана, Бразіліі, Манголіі, М’янмы, Рэспублікі Карэя.

«Нягледзячы на тое, што адбываецца каля нашых межаў, цяпер, як і ва ўсе гады, на фестывальнай сцэне гучалі беларуская, руская, украінская мовы, песні іншых краін і брацкіх народаў. Гэта прыклад таго, як мастацтва пераадольвае бар’еры і аб’ядноўвае ўсіх нас, людзей», — падкрэсліў кіраўнік дзяржавы.

Аляксандр Лукашэнка таксама па традыцыі выказаўся аб адносінах Беларусі з кожнай з дзяржаў, адзначыўшы важнасць і зацікаўленасць у развіцці супрацоўніцтва з імі.

Пра Узбекістан

Прэзідэнт назваў Узбекістан ключавой краінай для Беларусі ў Цэнтральнай Азіі.

«Нядаўні гістарычны візіт у нашу краіну Прэзідэнта Узбекістана азнаменаваў новы этап у двухбаковых адносінах, якія выйшлі на ўзровень стратэгічнага партнёрства, — падкрэсліў беларускі лідар. — Гэтаму шмат у чым спрыяе высокая дынаміка гандлёва-эканамічнага супрацоўніцтва. І мы гатовыя ўсяляк пашыраць яго з акцэнтам ужо на прамысловую кааперацыю».

Пра Бразілію

Кіраўнік дзяржавы адзначыў, што ўвага Беларусі да Лацінскай Амерыкі тлумачыцца перш за ўсё ўпэўненасцю ў перспектывах узаемавыгадных сувязяў з краінамі рэгіёна.

Аляксандр Лукашэнка вітаў рост міжнароднай значнасці Бразіліі і яе ўкладу ў фарміраванне глабальнага парадку дня. «Для Беларусі ваша краіна — найважнейшы гандлёва-эканамічны партнёр у заходнім паўшар’і», — падкрэсліў Прэзідэнт.

Пра Перу

Гаворачы аб гэтай краіне, Прэзідэнт адзначыў, што яе паспяховае развіццё шмат у чым вызначаецца высокай дынамікай у аграрным сектары і горназдабыўной прамысловасці. «У Беларусі вы знойдзеце шырокую лінейку неабходнай для гэтых сфер машынабудаўнічай прадукцыі», — звярнуў увагу беларускі лідар.

Пра Манголію

«У Азіі, вобразна кажучы, б’ецца сэрца сучаснага свету, і мы рады партнёрству з краінамі гэтага рэгіёна, — падкрэсліў кіраўнік дзяржавы. — Беларусь шчыра прылічае Манголію да ліку сяброў. У аснове трывалых адносін паміж нашымі краінамі і народамі — памяць аб сумесным супрацьстаянні нацысцкай Германіі і мілітарысцкай Японіі». 

Вялікае значэнне, паводле слоў Прэзідэнта, Беларусь надае ўмацаванню кантактаў на вышэйшым узроўні. У краіне таксама разлічваюць, што ўзаемнае прызначэнне новых актыўных паслоў і ўступленне ў сілу часовага гандлёвага пагаднення паміж Еўразійскім эканамічным саюзам і Манголіяй будуць спрыяць нарошчванню эканамічнага супрацоўніцтва.

Пра М’янму

Аляксандр Лукашэнка адзначыў значныя намаганні, прыкладзеныя апошнім часам для актывізацыі дыялогу з М’янмай у палітычнай, гуманітарнай і гандлёва-эканамічнай галінах.

«У рабоце шэраг канкрэтных праектаў у прамысловасці, сельскай гаспадарцы, фармацэўтыцы, гуманітарнай сферы», — сказаў беларускі лідар.

Пра Рэспубліку Карэя

Характарызуючы адносіны Беларусі з Рэспублікай Карэя, кіраўнік дзяржавы адзначыў іх здаровы прагматызм. Прэзідэнт заявіў аб гатоўнасці развіваць супрацоўніцтва ў галінах узаемнай цікавасці.

«Будзем вітаць крокі Сеула па актывізацыі беларуска-карэйскіх сувязяў у першую чаргу ў эканамічнай, тэхналагічнай і інвестыцыйнай сферах», — сказаў Аляксандр Лукашэнка.

Пра Саудаўскую Аравію

Прэзідэнт падкрэсліў, што Беларусь падтрымлівае актыўныя кантакты з дзяржавамі Блізкага Усходу.

«Саудаўская Аравія з’яўляецца для нас аўтарытэтным палітычным і перспектыўным гандлёва-эканамічным партнёрам, асабліва ў галіне сельскай гаспадаркі і харчовай бяспекі, прамысловасці, інфармацыйных тэхналогій і іншых», — сказаў кіраўнік дзяржавы.

Аляксандр Лукашэнка звярнуў увагу на важнасць сумесных намаганняў па нарошчванні гандлю і інвестыцыйнага супрацоўніцтва, каб папоўніць скарбонку двухбаковых адносін некалькімі гісторыямі поспеху і вывесці беларуска-саудаўскае ўзаемадзеянне на якасна новы ўзровень.

Пра Лівію

«Складаная геапалітычная абстаноўка доўгі час не дазваляла ў поўнай меры рэалізаваць існуючы патэнцыял супрацоўніцтва з Лівіяй», — сказаў беларускі лідар.

Кіраўнік дзяржавы пазначыў гатоўнасць развіваць адносіны з гэтай краінай, пастаўляць у Лівію сельскагаспадарчую тэхніку і медыкаменты, нарошчваць экспарт беларускіх медыцынскіх, іншых паслуг, а таксама перадаваць тэхналогіі, навучаць у Беларусі лівійскіх спецыялістаў. «Перакананы, што ўмовы для актывізацыі сумеснай работы сёння спрыяльныя», — падкрэсліў Аляксандр Лукашэнка.

Пра Руанду

«Беларусь імкнецца да пашырэння адносін з Руандай. Надаём асаблівую важнасць эканамічнаму кампаненту ўзаемадзеяння як фундаменту для развіцця палітычнага дыялогу», — сказаў беларускі лідар.

У якасці прыярытэтных галін Прэзідэнт назваў прамысловасць і сельскую гаспадарку, адукацыю, інфармацыйныя тэхналогіі, абарону і бяспеку. Аляксандр Лукашэнка таксама прапанаваў фарміраваць умовы для росту ўзаемнага гандлю і заснаваць для гэтых мэт сумесную камісію па супрацоўніцтве.