Візіт у сталіцу Расіі пачаўся 8 мая — у гэты дзень прайшлі перагаворы беларускага лідара з яго расійскім калегам Уладзімірам Пуціным у Крамлі.

«Мы не можам з вамі гэту Перамогу каму-небудзь аддаць»

Сустрэча адбылася напярэдадні вялікага свята, і размова найперш зайшла пра значэнне Дня Перамогі ў сучасных рэаліях. Беларускі лідар падкрэсліў, што Перамога — вялікі агульны здабытак усіх рэспублік Савецкага Саюза.

«Гэта такое наша дасягненне. Нашы продкі ў свой час выратавалі ад карычневай чумы не толькі Еўропу — увесь свет. Зразумела, што было б не толькі з намі, прайграй вайну нашы папярэднікі. Гэта наш вялікі здабытак. Мы з гэтага зыходзім. Гэта здабытак і расіян, і беларусаў, і ўсіх рэспублік Савецкага Саюза. Ваявалі ж усе (няхай не да ўсіх вайна дайшла) і гінулі дзясяткамі,сотнямі, тысячамі», — адзначыўАляксандр Лукашэнка.

Ён звярнуў увагу на пазіцыю некаторых, з кім раней жылі ў адной дзяржаве, хто чамусьці адмаўляецца прызнаваць гэта свята: «Я ўсё ж такі не магу пазбавіцца думкі: некаторыя нашы сябры, суседзі, з кім мы жылі ў адной дзяржаве, чамусьці адмаўляюцца прызнаваць гэтыя святы. Асабліва нашы суседзі, беларускія. Заўсёды паўстае пытанне: вось навошта яны гэта робяць?»

«Проста непрыгожа і агідна, шчыра кажучы, калі назіраеш за некаторымі нашымі „таварышамі“, якія вырашылі не тое што забыць, а наогул кінуць пад ногі гэту Перамогу, — заўважыў беларускі лідар. — Ну а ўвогуле вядомыя асобы, у якіх продкі блізкія (бацькі, дзяды) ваявалі ў гэтай вайне, яны зусім незразумела як сябе паводзяць».

«Але мы не можам з вамі гэту Перамогу каму-небудзь аддаць. Гэта наш здабытак, наша дасягненне. Беларусы страцілі кожнага трэцяга ў гэтай вайне. Які Прэзідэнт у Беларусі можа сабе дазволіць кінуць пад ногі, як анучу, гэту Вялікую Перамогу?! Ніякі! Таму я Вам удзячны за тое, што Вы пастаянна запрашаеце мяне (лічыце — беларускі народ) да ўдзелу ў гэтым вялікім дзействе (размова пра парад Перамогі. — Заўв.). Некалі нашы продкі па Краснай плошчы ў цяжкі час праходзілі вельмі ярка і ішлі на фронт з першага парада. Я гэтым ганаруся. Ведаю, што і Вы гэта цэніце і ганарыцеся. Таму надыдзе час, калі да нас будуць прасіцца сюды, каб прыехаць і пабыць на гэтай плошчы. Ну а сёння час паказаў, хто ёсць хто», — падкрэсліў кіраўнік беларускай дзяржавы.

У сваю чаргу Уладзімір Пуцін падзякаваў Аляксандру Лукашэнку за візіт у Маскву для ўдзелу ў святкаванні 9 Мая. «Паважаны Аляксандр Рыгоравіч, вельмі рады Вас бачыць напярэдадні нашага агульнага, самага галоўнага свята для нашых народаў — Дня Перамогі савецкага народа ў Вялікай Айчыннай вайне, — сказаў расійскі лідар. — Для Вас нічога нечаканага не скажу, а для нашых людзей, нашых грамадзян усё ж такі гэта важна. Мы нікога не запрашалі афіцыйна. Мы проста сказалі, што будзем рады бачыць усіх, хто захоча прыехаць. Асабліва гэта актуальна і зразумела ў сённяшняй абстаноўцы. Маю на ўвазе і пытанні забеспячэння бяспекі. Аляксандр Рыгоравіч, дзякуй, што Вы тут».

«Мы неяк нядрэнна жывём»

Што датычыцца беларуска-расійскага супрацоўніцтва, Аляксандр Лукашэнка заявіў аб адсутнасці якіх-небудзь сур’ёзных спрэчак.

Кіраўнік дзяржавы адзначыў, што на постсавецкай прасторы Беларусь па аб’ёме ўзаемнага гандлю — асноўны партнёр Расіі. «Пры такіх велізарных аб’ёмах — пад 60 млрд долараў ужо, лічыце, ёсць — заўсёды будуць нейкія праблемы. Але мы неяк нядрэнна жывём гэтыя гады. У нас ніколі не было нейкіх сур’ёзных спрэчак. Адно-два пытанні, якія мы абмяркоўваем і даручаем урадам „разруліць“ іх», — сказаў Аляксандр Лукашэнка.

«І вось я сёння падумаў таксама: напэўна, паўтара пытання, якія мы з Вамі абмяркуем. А астатняе — гэта наша Вялікая Перамога (святкаванне Дня Перамогі. — Заўв.). Дзякуй, што запрасілі», — дадаў Прэзідэнт Беларусі.

«Нам заўсёды ёсць аб чым пагаварыць па бягучых пытаннях, звязаных з эканомікай, з пытаннямі сацыяльнага характару. Аб’ём гандлю з’яўляецца рэкордным, нягледзячы на цяжкасці, якія нам спрабуюць стварыць звонку. Усё ў нас у цэлым паспяхова», — сказаў Уладзімір Пуцін.

Прэзідэнт Расіі адзначыў, што праінфармуе Прэзідэнта Беларусі аб стане расійскай эканомікі. Паводле яго слоў, там ёсць добрыя тэндэнцыі, якія, як правіла, уплываюць і на партнёраў па Еўразійскім эканамічным саюзе. «Тым больш (уплываюць. — Заўв.) на нашы адносіны з Беларуссю, паколькі ў нас усё ж такі нават больш глыбокія адносіны, чым з ЕАЭС, па некаторых кірунках», — падкрэсліў ён.

Пасля сустрэчы ў Крамлі адбылася рабочая вячэра. Крыху пазней да лідараў Беларусі і Расіі далучыліся калегі з Казахстана і Узбекістана Касым-Жамарт Такаеў і Шаўкат Мірзіёеў, якія таксама прыбылі ў Маскву для ўдзелу ва ўрачыстасцях з нагоды Дня Перамогі.

Назаўтра Прэзідэнт Беларусі Аляксандр Лукашэнка прысутнічаў на парадзе ў гонар 81-й гадавіны Перамогі ў Вялікай Айчыннай вайне. Аляксандр Лукашэнка прыбыў на Красную плошчу разам з Прэзідэнтам Расіі Уладзімірам Пуціным. 

«Нават калі не запрасілі б, я прыехаў бы на сваю Красную плошчу»

Аляксандр Лукашэнка прыбыў на Красную плошчу разам з Прэзідэнтам Расіі Уладзімірам Пуціным. Кіраўнік беларускай дзяржавы з іншымі лідарамі размясціўся на цэнтральнай трыбуне побач з ветэранамі.

Пасля ваеннага парада Аляксандр Лукашэнка і кіраўнікі дэлегацый усклалі кветкі да Магілы Невядомага Салдата каля сцен Крамля, ушанаваўшы памяць загінулых у Вялікай Айчыннай вайне.

Ва ўрачыстасцях у гонар 81-й гадавіны Перамогі ў Маскве таксама ўзялі ўдзел прэзідэнты Казахстана, Узбекістана, Лаоса, вярхоўны правіцель Малайзіі.  Пасля завяршэння ўрачыстых мерапрыемстваў у Маскве Аляксандр Лукашэнка паразмаўляў з журналістамі.

Кіраўнік беларускай дзяржавы пазітыўна ацаніў парад Перамогі, які прайшоў у Маскве.

«Я перажываў, што вы ўкарацілі яго, і думаў, як атрымаецца. Я вам скажу, што ўсё вельмі добра. У мяне добрыя ўражанні», — сказаў беларускі лідар.

«Нават калі не запрасілі б, я прыехаў бы на сваю Красную плошчу. У сваю Маскву. Я нарадзіўся, калі Масква была сталіцай (Савецкага Саюза. — Заўв.)», — заявіў Аляксандр Лукашэнка.

Прэзідэнт Беларусі падкрэсліў, што Дзень Перамогі — вялікае свята. «Як паказаў цяперашні час, ніхто не зможа нам перашкодзіць святкаванню гэтай Вялікай Перамогі. Гэта наш здабытак. Страціць нельга», — сказаў ён.

Аляксандр Лукашэнка дадаў, што пасля ўрачыстых мерапрыемстваў у Маскве накіроўваецца ў Мінск, каб ужо ў беларускай сталіцы ўзяць удзел ва ўрачыстасцях з нагоды Дня Перамогі. Адказваючы на пытанне наконт узбраенняў, якія ёсць у распараджэнні ваенных у Расіі і Беларусі, Аляксандр Лукашэнка сказаў:

«Я ведаю добра вашы ўзбраенні, таму што яны і нашы. Сёе-тое мы ўжо дабавілі да таго, што ў вас ёсць. Сёе-тое мы набылі ў вас. Таму сёння мы як ніколі валодаем добрым арсеналам добрай зброі».

Адзін з журналістаў пацікавіўся, ці спакойна сябе адчувае Прэзідэнт Беларусі, нягледзячы на тое, што адбываецца навокал.

«Я заўсёды быў спакойны. І сёння тым больш. Усё будзе нармальна. Усе хочуць жыць. Як бы вы, журналісты, не падавалі гэты розны матэрыял з усіх бакоў, усе хочуць жыць. І амерыканцы, і ўкраінцы, і расіяне, і беларусы. Таму ўсё будзе нармальна. У аснове — жыццё», — упэўнены кіраўнік беларускай дзяржавы.

Даслоўна

Прэзідэнт Расіі назваў праявай мужнасці прыезд замежных лідараў у Маскву на Дзень Перамогі. Аб гэтым Уладзімір Пуцін заявіў, адказваючы на пытанні журналістаў.

«Тыя, хто прыехаў, безумоўна, праявілі ў пэўнай ступені асабістую мужнасць», — цытуе расійскага лідара БелТА.

Ён адзначыў, што кіраўнікам замежных дзяржаў стала вядома аб дасягнутых з прэзідэнтам ЗША Дональдам Трампам дамоўленасцях па перамір'і з Украінай пасля іх прыбыцця ў Маскву. «Гэта значыць, ім стала вядома аб разрадцы гэтай сітуацыі толькі пасля таго, як яны прыехалі», — сказаў Уладзімір Пуцін.

Паводле прэс-службы Прэзідэнта