Прэзідэнт Беларусі Аляксандр Лукашэнка на нарадзе з кіраўніцтвам Савета Міністраў заявіў, што яго насцярожвае паток зваротаў па льготы і прапановы па рэструктурызацыі тых ці іншых запазычанасцяў прадпрыемстваў, перадае БелТА.
Напрыклад, урадам унесены праект указа аб рэструктурызацыі запазычанасці арганізацый цэментнай галіны.
«Шчыра кажучы, мяне насцярожвае паток гэтых зваротаў па льготы і „пернікі“. Асабліва з прызначэннем новага Прэм’ер-міністра. Не хацелася б, Аляксандр Генрыхавіч (Прэм’ер-міністр Аляксандр Турчын. — Заўв. БелТА), думаць, што вы такім чынам адкрываеце нейкую новую палітыку: вось гэта дадзім, гэта. Гэта ж зразумела — курсавыя розніцы і іншае... Узяў канкрэтны дырэктар прадпрыемства — ідзі і працуй, упірайся, — сказаў Прэзідэнт. — Нейкія льготы, бюджэт і іншае. А вы пачынаеце мудрагеліста мне распісваць і як увайсці ў становішча. Вось я баюся, што ўрад можа ўзяць такі курс, калі не ўзяў. Вось абавязкова трэба там камусьці дапамагчы, спісаць... Можа, камусьці і трэба дапамагчы, калі гэта трэба дзяржаве. Вось каб у нас гэтага не здарылася».
«Таму я вельмі часта і патрабую заключэння і Камітэта дзяржкантролю, і старшыні Нацыянальнага банка па тым ці іншым пытанні. Каб у нас лінія была адна. Таму што Прэм’ер новы, але Прэзідэнт жа ў нас той жа. І лінію вызначае Прэзідэнт, і трэба гэтай лініі прытрымлівацца. А вельмі часта і рэструктурызацыя запазычанасці арганізацый цэментнай галіны. Што значыць „рэструктурызацыя запазычанасці“? Я разумею, што вы мне прапануеце, але я заўсёды арыентаваў: трэба прымушаць працаваць кіраўніка. Прыйшоў — працуй», — падкрэсліў беларускі лідар.
