Прэзідэнт Беларусі Аляксандр Лукашэнка накіраваў спачуванне Прэзідэнту Лаоса Тханглуну Сісуліту ў сувязі са смерцю Старшыні Нацыянальнага сходу Лаоскай Народна-Дэмакратычнай Рэспублікі Ксайсамфона Фамвіхана. Аб гэтым БелТА паведамілі ў прэс-службе кіраўніка дзяржавы.
Аляксандр Лукашэнка падкрэсліў, што Ксайсамфон Фамвіхан быў адданым сынам лаоскай зямлі, які прысвяціў жыццё служэнню радзіме.
«У Рэспубліцы Беларусь падзяляюць з лаоскім народам горыч незаменнай страты. Беларусы заўсёды будуць памятаць пра ўклад спадара Ксайсамфона Фамвіхана ва ўмацаванне дружалюбных беларуска-лаоскіх адносін, развіццё міжпарламенцкага супрацоўніцтва», — гаворыцца ў спачуванні.
Беларускі лідар перадаў словы падтрымкі родным, блізкім, калегам і паплечнікам Ксайсамфона Фамвіхана.
