Нагадаем, што 29 кастрычніка Аляксандр Лукашэнка правёў тэлефонную размову са сваім казастанскім калегам Касым-Жамартам Такаевым. Кіраўнікі дзяржаў дамовіліся, што ўрадавая дэлегацыя Беларусі ў найбліжэйшы час здзейсніць візіт у Казахстан і ўнясе канкрэтныя прапановы па паглыбленні супрацоўніцтва.

Акрамя таго, у панядзелак кіраўнік урада далажыў кіраўніку дзяржавы і аб рабоце па шэрагу іншых важных і актуальных пытанняў. 

Журналістам Аляксандр Турчын расказаў аб некаторых дэталях даклада Прэзідэнту.

Ключавым пытаннем візіту ў Казахстан ён назваў далейшае развіццё супрацоўніцтва ў сферы машынабудавання. «Цэлы шэраг сумесных прадпрыемстваў, якія сёння размешчаны ў Казахстане. Гэта сумесныя праекты з ключавымі нашымі флагманамі машынабудавання: МТЗ, „Гомсельмаш“, МАЗ, БЕЛАЗ. Таму далейшая інтэнсіфікацыя гэтага супрацоўніцтва — ключавая задача нашага візіту. Раней на сустрэчах з казахстанскімі калегамі ставілася задача, каб міністэрствы прамысловасці дзвюх краін мелі канкрэтны план мерапрыемстваў па далейшым супрацоўніцтве», — расказаў Аляксандр Турчын. 

Прэм’ер-міністр паведаміў, што беларуская ўрадавая дэлегацыя ўжо 4 лістапада накіроўваецца з афіцыйным візітам у Казахстан. «Кіраўнік дзяржавы вельмі паглыблены ў тэматыку нашых двухбаковых адносін. Літаральна на мінулым тыдні падчас тэлефоннай размовы з Прэзідэнтам Казахстана яны абмяняліся думкамі па актуальных пытаннях супрацоўніцтва. Быў абмеркаваны шэраг пытанняў, аб рэалізацыі якіх я падрабязна праінфармую Прэзідэнта Рэспублікі Казахстан», — адзначыў кіраўнік урада.

Аляксандр Турчын назваў Казахстан надзейным сябрам і адным з самых ключавых партнёраў Беларусі. «І мы заўсёды падстаўлялі адно аднаму плячо. У складаных сітуацыях заўсёды знаходзілі развязкі, калі ўзнікалі спрэчныя моманты. Таму я ўпэўнены, што і маючы адбыцца візіт пройдзе менавіта ў такім канструктыўным ключы, — сказаў Прэм’ер-міністр. — Парадак дня вельмі шырокі. Сёння гэта і „лічба“, і машынабудаванне, і пастаўкі нашага харчавання. Гэта значыць шырокі спектр пытанняў, якія нам неабходна абмеркаваць. Штогод расце наш тавараабарот. Ён дэманструе рост і сёлета. Таму мы настроеныя, каб гэтыя тэндэнцыі толькі ўзмацняліся, і ўрад зробіць усё, каб гэта атрымалася».

Кіраўнік урада адзначыў, што ў склад дэлегацыі Беларусі ўваходзяць не толькі прадстаўнікі дзяржорганаў, але і бізнес-колаў, якім неабходна з казахстанскімі партнёрамі ўдасканальваць далейшае развіццё ўзаемных праектаў. Па словах Аляксандра Турчына, і для яго асабіста Казахстан не чужая краіна. Раней, працуючы на пасадзе першага віцэ-прэм’ера, ён быў сустаршынёй беларуска-казахстанскай міжурадавай камісіі, а кіруючы Мінскай вобласцю, падтрымліваў цесныя ўзаемаадносіны з калегамі з рэгіёнаў Казахстана.