Асноўныя тэмы, якія закраналіся падчас закрытага даклада Галоўнакамандуючаму, — падрыхтоўка да сумеснага стратэгічнага вучэння Узброеных Сіл Рэспублікі Беларусь і Расійскай Федэрацыі «Захад-2025», аператыўная абстаноўка паблізу Дзяржаўнай граніцы, гатоўнасць да рэагавання на пагрозы, што ўзнікаюць. 

«Мы сябе адчуваем упэўнена, спакойна. Тэму вучэння не ўтойваем» 

Палітычны аглядальнік тэлеканала «Першы інфармацыйны» папрасіла Віктара Хрэніна падрабязна расказаць аб пытаннях, якія гучалі падчас даклада кіраўніку дзяржавы. 

«Адбыўся грунтоўны закрыты даклад аб стане спраў ва Узброеных Сілах, абстаноўцы на сумежжы: што адбываецца на тэрыторыі суседніх з намі краін, якая ваенная актыўнасць назіраецца, — удакладніў кіраўнік ваеннага ведамства. — Гэта ўсё было грунтоўна даложана Прэзідэнту. Аб ступені гатоўнасці Узброеных Сіл да адбіцця агрэсіі, аб ступені гатоўнасці да правядзення вучэння "Захад-2025", а таксама да правядзення вучэння АДКБ, якое пачнецца непасрэдна ў канцы жніўня і будзе праводзіцца на нашай тэрыторыі».

Найбольш грунтоўна і падрабязна, па словах міністра, у размове з кіраўніком дзяржавы абмяркоўвалася тэма вучэння «Захад-2025» — у адпаведнасці з ранейшымі ўказаннямі Галоўнакамандуючага. «Як і заяўлялася раней кіраўніком дзяржавы, усе асноўныя актыўныя мерапрыемствы і войскі будуць дзейнічаць у цэнтры нашай краіны, на асноўных палігонах, якія знаходзяцца каля горада Барысава, — канкрэтызаваў Віктар Хрэнін. — Ужо пачынаюць прыбываць расійскія войскі. Два падраздзяленні Расіі прыбылі, ажыццяўляюць размяшчэнне на дадзеным палігоне. З нашага боку таксама два падраздзяленні 120-й механізаванай брыгады адправіліся на тэрыторыю Расійскай Федэрацыі, дзе непасрэдна будуць прымаць удзел у практычных мерапрыемствах, розыгрышах вучэння «Захад-2025». 

Міністр абароны падкрэсліў, што да правядзення вучэння штабы гатовы. Завяршаюцца мерапрыемствы падрыхтоўкі палігонаў. 

«Мы сябе адчуваем упэўнена, спакойна, — акцэнтаваў увагу ён. — Тэму вучэння не ўтойваем. Асноўная тэма вучэння — гэта адпрацоўка абароны нашай тэрыторыі сумесна з рэгіянальнай групоўкай войск. Мерапрыемства планавае, гэта не нейкае раптоўнае рашэнне. Як, пачынаючы з 2020 года, было прынята рашэнне аб стварэнні рэгіянальнай групоўкі, так дакладна вытрымліваем рашэнне нашых кіраўнікоў дзяржаў: кожныя два гады праводзім гэтыя вучэнні».

Па словах міністра, манеўры «Захад-2025» пройдуць у два этапы. Пачнецца вучэнне 12 верасня, 16 верасня скончыцца. «У ходзе першага этапу мы плануем больш адпрацаваць работу штабоў па планаванні і кіраванні войскамі ў ходзе адбіцця агрэсіі Саюзнай дзяржавы, — канкрэтызаваў кіраўнік абароннага ведамства. — На другім этапе плануем адпрацаваць пытанні вызвалення меркаванай захопленай тэрыторыі і стабілізацыі абстаноўкі. Гэта прама заяўляем, таму ў спакойным рэжыме збіраемся гэта ўсё выканаць».

Акрамя таго, Віктар Хрэнін далажыў кіраўніку дзяржавы аб падрыхтоўцы да вучэнняў у рамках АДКБ, якія з 31 жніўня па 6 верасня пройдуць на тэрыторыі Беларусі. «У нас пройдзе тры вучэнні на тэрыторыі Рэспублікі Беларусь: «Пошук, „Эшалон“ і „Узаемадзеянне“, — удакладніў ён. — На палігоне ў Віцебскай вобласці. Ужо частка падраздзяленняў ад Расійскай Федэрацыі прыбыла на дальні палігон. Далей мы чакаем кантынгенты ад краін АДКБ. Таксама — спакойна, планава. Галоўнае ў вучэнні — прадэманстраваць усім сваю адкрытасць».

«Мы сапраўды хочам знізіць гэту ваенную напружанасць»

Рэдактар аддзела рэдакцыі газеты «Звязда» звярнула ўвагу на тое, што аб нашай адкрытасці не раз гаварыў Прэзідэнт, і спытала, ці будзем мы запрашаць на вучэнне «Захад-2025» назіральнікаў. 

«Абавязкова будзем! — падкрэсліў міністр абароны. — Менавіта ў рамках адкрытасці. Калі казаць мовай лічбаў і дакументаў, ёсць дзяржавы - удзельніцы Венскага дакумента (аб мерах умацавання даверу і бяспекі. — "Зв".), гэта 56 краін, усім ім накіраваны запрашэнні. Пакуль мы чакаем адказаў. Сказаць, хто будзе канкрэтна, пакуль не магу. Чакаем, што да 20 жніўня адказы паступяць ад усіх, хто хоча прыбыць назіраць за нашымі вучэннямі». 

Акрамя таго, у рамках двухбаковага міжнароднага ваеннага супрацоўніцтва Беларусь накіравала запрашэнні яшчэ 25 краінам. У асноўным дзяржавам - удзельніцам ШАС, АДКБ, СНГ. Запрашэнні стаць назіральнікамі за вучэннем «Захад-2025», па словах міністра, накіраваны і кіраўнікам абаронных ведамстваў, іх прадстаўнікам з іншых сяброўскіх нам краін, што не ўваходзяць у гэтыя аб’яднанні.

«У нас у краіне знаходзіцца больш як 30 прадстаўнікоў ваенных аташэ, з іх — 9 краін НАТА, — дадаў Віктар Хрэнін. — Мы іх усіх запрашаем назіраць за нашымі вучэннямі. Гэтым самым яшчэ раз падкрэсліваем свае міралюбства і адкрытасць, тое, што мы сапраўды хочам знізіць гэту ваенную напружанасць, якую, на жаль, мы бачым, адчуваем. Мы робім першы крок. Хацелася б чакаць крокаў у адказ ад нашых суседзяў». 

«Будзем трэніраваць і войскі, і штабы вучыцца абараняць нашу краіну»

Карэспандэнт інфармацыйнага агенцтва БелТА пацікавіўся, ці будуць на вучэнні задзейнічаны новыя спецыяльныя элементы. Напрыклад, абсталявання тэрыторый. Журналіст нагадаў, што кіраўнік дзяржавы асабіста знаёміўся з умацаванымі раёнамі, на гэты конт былі дадзены даручэнні. 

«З нядаўняга часу мы прадставілі нашы бачанне і аснову, як мы ўсё-такі плануем будаваць абарону нашай дзяржавы, — расказаў міністр абароны. — І кіраўніку дзяржавы ў Брэсцкай вобласці, у Кобрынскім раёне, быў прадстаўлены элемент умацраёна. Пасля гэтага Прэзідэнт даручыў, абапіраючыся зноў жа на нашы планы, якія мы цяпер пераглядаем, (таксама кажу адкрыта: ідзе распрацоўка дакумента — плана абароны дзяржавы), такія элементы ўмацраёнаў абсталяваць на выпадак абароны нашай краіны».

Па словах кіраўніка ваеннага ведамства, на бягучы момант з пяці ўмацраёнаў чатыры ўжо гатовы, перададзены Міністэрству абароны. Яны актыўна выкарыстоўваюцца войскамі ў ходзе мерапрыемстваў баявой падрыхтоўкі. 

«На вучэнні "Захад-2025" мы таксама плануем у двух з гэтых пяці раёнаў правесці трэніроўку нашых войскаў, — праінфармаваў Віктар Хрэнін. — Таксама прама кажу: гэта будзе ваўкавыскі і смаргонскі напрамкі, дзе будуць невялікія падраздзяленні выконваць практычныя задачы па адбіцці магчымага праціўніка. Робім розыгрышы адпаведныя, усю гэту справу плануем і паказваем».

Падчас сумеснага стратэгічнага вучэння будуць задзейнічаны ўсе сілы і сродкі ад Узброеных Сіл Рэспублікі Беларусь. «Аснову складуць войскі Заходняга і Паўночна-заходняга камандаванняў, — канкрэтызаваў міністр абароны. — Вядома ж, не абыдзецца без нашых сіл спецыяльных аперацый, нашых дэсантнікаў, якія найбольш падрыхтаваныя, — найлепшых элітных падраздзяленняў».

Акрамя таго, у сваім дакладзе кіраўніку дзяржавы Віктар Хрэнін праінфармаваў, як выконваецца зацверджаны Галоўнакамандуючым план будаўніцтва і развіцця Узброеных Сіл, як ідуць далейшыя мерапрыемствы па развіцці сіл спецыяльных аперацый. У прыватнасці, перагледжана арганізацыйная структура сіл спецыяльных аперацый, істотна палепшылі яе агнявую моц. У падначаленні гэтага элітнага падраздзялення — радыеактыўны полк, зенітна-ракетны полк. 

«Усе гэтыя падраздзяленні будуць дзейнічаць як на палігонах, так і на ўчастках мясцовасці на тэрыторыі Рэспублікі Беларусь у складзе батальённых тактычных груп, ротных тактычных груп, — удакладніў генерал-лейтэнант. — Будзем трэніраваць і войскі, і штабы менавіта вучыцца абараняць нашу краіну».

«Мы плануем адпрацаваць пытанні планавання прымянення ядзернай зброі» 

Адказваючы на пытанне палітычнага аглядальніка тэлеканала АНТ, ці будуць адпрацоўвацца падчас вучэння «Захад-2025» элементы прымянення ракетнага комплексу «Арэшнік», ядзернай зброі, міністр абароны адзначыў, што гэта пытанне цікавіць усіх. 

«Мы плануем адпрацаваць пытанні планавання прымянення ядзернай зброі, — заўважыў ён. — Гэта для нас важны элемент стратэгічнага перш за ўсё стрымлівання. Як патрабуе кіраўнік дзяржавы, мы павінны быць гатовы да ўсяго. Мы бачым абстаноўку, якая складваецца паблізу нашых заходніх, паўночных граніц, і не можам спакойна назіраць за мілітарызацыяй і ваеннай актыўнасцю. Нягледзячы на тое, што мы дэманструем сваю адкрытасць, міралюбства, порах трэба заўсёды трымаць сухім. Гэта ўсё-такі зброя павышанай магутнасці, якая здольная нанесці непрымальную шкоду таму ворагу, які захоча ўступіць на тэрыторыю нашай краіны». 

Віктар Хрэнін акцэнтаваў увагу на тым, што натаўскія кіраўнікі спрабуюць выкарыстаць вучэнне «Захад-2025» як нагоду правядзення сваіх вучэнняў, пераносяць тэрміны правядзення вучэнняў на тэрыторыі краін Балтыі. «Мы гэта бачым, — канстатаваў ён. — На цяперашні момант два вучэнні ў іх праходзіць. Больш за ўсё насцярожвае рашэнне польскага ваенна-палітычнага кіраўніцтва: яны хочуць стварыць групоўку звыш 30-34 тысяч ваеннаслужачых. Гэта ўжо сур’ёзная групоўка, па нашай ацэнцы. Трэба вельмі ўважліва глядзець, і мы гэтым будзем займацца і рэагаваць, калі яны будуць выказваць пэўную агрэсію ў адносінах да Рэспублікі Беларусь. У нас ёсць чым адказаць».

Што датычыцца «Арэшніка», міністр нагадаў словы кіраўніка дзяржавы, які казаў аб тым, што ўсе рашэнні прыняты, месца вызначана, работы вядуцца. «Мы, вядома ж, і ў рамках нашага вучэння "Захад" таксама разам з расійскімі калегамі адпрацуем пытанні планавання прымянення гэтага віду зброі», — канстатаваў Віктар Хрэнін.

«Патрабаванне кіраўніка дзяржавы — не расслабляцца»

Карэспандэнт міждзяржаўнай тэлерадыёкампаніі «Мір» спытала, ці гатова наша армія, улічваючы няпростую сітуацыю на граніцы з Беларуссю (маючы на ўвазе шматлікія правакацыі, нагнятанне абстаноўкі), да адбіцця рознага кшталту раптоўных нападзенняў з боку патэнцыяльнага праціўніка.

«Гэта асноўная наша задача — быць гатовым да адбіцця агрэсіі праціўніка, — падкрэсліў Віктар Хрэнін. — Уся дзейнасць Узброеных Сіл менавіта на гэта і накіравана. Мы пастаянна займаемся ўдасканаленнем узроўню сваёй падрыхтоўкі (штабоў, войскаў), удакладняем структуру Узброеных Сіл. Мы глядзім, як развіваюцца канфлікты, уносім змяненні ў свае дакументы, формы і спосабы дзеянняў войск. Назіраем за развіццём сродкаў узброенай барацьбы, якія таксама сёння вельмі імкліва развіваюцца. Тыя ж беспілотныя лятальныя апараты, якія ўварваліся і аказваюць сур’ёзныя змяненні на полі бою. Гэта ўсё ўлічваем і абавязкова ўкараняем у свае Узброеныя Сілы». 

Міністр абароны акцэнтаваў увагу на тым, што для ваеннаслужачых гэта пастаянны, бясконцы працэс. «І, вядома ж, патрабаванне кіраўніка дзяржавы — не расслабляцца, — дадаў генерал-лейтэнант. — Мы праводзім і вучэнні, і трэніроўкі, і мабілізоўваем ваеннаабавязаных. Вы бачыце той вялікі комплекс мерапрыемстваў, чым цяпер займаюцца Узброеныя Сілы».

У абароннага ведамства ёсць разуменне таго, што і вораг не спіць. «Глядзіць за намі, ацэньвае нас, — заўважыў Віктар Хрэнін. — І мы павінны думаць, як і ён будзе дзейнічаць супраць нас. Таму гэтыя сцэнарыі ў ходзе ўсіх штабных трэніровак, вучэнняў заўсёды разглядаюцца. Яны ўвесь час розныя. Гэта мы называем падрыхтоўкай і гатоўнасцю да адбіцця агрэсіі».

Вераніка КАНЮТА

Фота БелТА