Карове варта паставіць помнік
Гэтым разам пытанні былі больш глабальныя — аб развіцці жывёлагадоўлі ў цэлым. Аляксандр Лукашэнка нагадаў аб сваёй прапанове паставіць помнік карове як прызнанне заслуг гэтай жывёлы, асабліва ў цяжкі ваенны час. «Людзі сыходзілі ў лясы і з сабой бралі скаціну, каб выжыць. Карова і сёння корміць народ. Гэта не толькі малако, але і мяса. Калі мы хочам быць здаровымі, трэба дыхаць нармальным паветрам і харчавацца нармальнымі прадуктамі. Зыходзячы з гэтага, карова, вобразна кажучы, павінна стаяць у палацы», — падкрэсліў беларускі лідар. Ён таксама нагадаў, што ў краіне ўжо вызначаны курс развіцця жывёлагадоўлі: старыя фермы неабходна пераўтварыць у жывёлагадоўчыя малочнатаварныя комплексы, дзе будуць выконвацца ўсе тэхналогіі ўтрымання буйной рагатай жывёлы і дзе будуць створаны ўсе неабходныя ўмовы. Размова важная і неабходная — і напярэдадні дзвюх нарад, анансаваных кіраўніком дзяржавы, — па захаванасці маладняку буйной рагатай жывёлы і па рабоце аграрна-прамысловага комплексу Віцебскай вобласці.
«Ёсць усё, каб арганізаваць працэс вытворчасці і перапрацоўкі»
Месца правядзення семінара, дарэчы, было выбрана невыпадкова. Аляксандр Лукашэнка расказаў, што папрасіў былога губернатара Мінскай вобласці, а цяпер Прэм’ер-міністра Аляксандра Турчына і іншых спецыялістаў вызначыць комплекс, з якога можна ўзяць прыклад. Выбралі МТК «Селішча-2» у агракамбінаце «Дзяржынскі». Тут усё выканана сучасна і якасна, але яшчэ і па-гаспадарску, эканомна. Аляксандр Лукашэнка звярнуў увагу, што такі вопыт перадавых гаспадарак варта пераймаць усім. «Патрэбна сучаснае ўтрыманне жывёлы. І прадаваць малако сортам „экстра“. Гэта сёння добрыя грошы, і сёння малако прыбытковае», — адзначыў кіраўнік дзяржавы. Ён падкрэсліў, што нажывацца на войнах і канфліктах, якіх сёння шмат у свеце, — не беларускі варыянт, але разам з тым людзей трэба накарміць. А значыць, попыт на прадукты харчавання і адзенне (а адзенне таксама з зямлі) будзе толькі ўзрастаць. «Таму нам абавязкова трэба ісці гэтым шляхам, трэба стварыць малочнатаварныя комплексы, дзе мы будзем утрымліваць жывёлу», — ставіць задачу Прэзідэнт. Паводле яго слоў, сёння вырабляць малако высокай якасці — вельмі прыбыткова, бо з яго таксама можна стварыць прадукцыю, запатрабаваную на знешнім і ўнутраным рынках.
«У вас сёння ёсць усё, каб арганізаваць працэс вытворчасці і перапрацоўкі. Жарты ў бок. Паўтараю, яшчэ раз: не хочаце ў акопах сядзець, у гразі вошай пладзіць — давайце працаваць. Захаванне тэхналогій і ваенная дысцыпліна. Вам дадзены ўсе правы. Калі не хочам вайны, значыць, трэба працаваць правільна.
Трэба атрымліваць прадукцыю і прадаваць. Трэба, каб сумленна падыходзілі да гэтай работы», — настроіў адказных за жывёлагадоўлю кіраўнік дзяржавы. І нагадаў пра дысцыпліну на працоўным месцы. Тым больш што, як падкрэсліў Прэзідэнт, мы ўмеем вырабляць якасныя прадукты харчавання, значыць, трэба гэта рабіць.
«Ціск адносна гэтага будзе сур’ёзны»
Кіраўнік дзяржавы зрабіў акцэнт на ўмовах утрымання буйной рагатай жывёлы, асабліва маладняку. Пры добрых умовах утрымання жывёлы памяншаецца падзеж, які для многіх гаспадарак з’яўляецца вялікай праблемай. А няма маладняку — няма малака і мяса.
«Ціск адносна гэтага будзе сур’ёзны. У нас ужо практыка з’явілася: Прэзідэнт задачу паставіў — ну і што, калі мы яе не выканаем за год-паўтара. Так больш не будзе», — папярэдзіў беларускі лідар. Акрамя камфортных умоў, патрэбныя яшчэ і якасныя кармы. У сувязі з гэтым Аляксандр Лукашэнка нагадаў аб даручэнні вырабіць айчынныя прэсы для нарыхтоўкі сенажу. І заадно даў даручэнне Камітэту дзяржкантролю — праехаць па краіне і паглядзець, як ідзе корманарыхтоўка. Асабліва гэта важна цяпер, калі ідуць ліўні і трэба своечасова пакаваць кармы ў плёнку. Няякасны корм — не сянаж, а «гнілаж» — небяспечны для здароўя каровы і цяляці. «Прэс трэба зрабіць. Гэта пытанне жыцця і смерці», — акцэнтаваў кіраўнік дзяржавы.
Таксама Прэзідэнт нагадаў аб сваім даручэнні вырабіць робаты для даення, якія б па якасці былі не горшыя за імпартныя. Паводле яго слоў, у гэтым ёсць вялікая перспектыва, паколькі работнікаў на вёсцы становіцца менш.
Не адрывацца ад зямлі
Аляксандр Лукашэнка звярнуў увагу на тое, што ўсе напрацоўкі і дасягненні ў сельскай гаспадарцы трэба захаваць для маладога пакалення, якое не так, як старэйшае, гатовае працаваць на зямлі. А між тым далучэнне моладзі вырашыла б многія праблемы. У прыклад Прэзідэнт прывёў скаргі на дэфіцыт бульбы. Ён параіў высадзіць хоць трохі бульбы на сваіх прысядзібных участках, у каго яны ёсць. І тады недахоп бульбы ў крамах не будзе такой вялікай праблемай. Аляксандр Лукашэнка заўважыў, што інтэнсіўныя тэхналогіі і індустрыялізацыя — гэта правільна і добра. Але галоўнае не адрывацца ад зямлі хоць бы ў сябе на ўчастку. Кіраўнік дзяржавы пацікавіўся ў намесніка кіраўніка спраў Прэзідэнта Мікалая Шарснёва, ці садзіць ён на дачы бульбу. «Штогод саджу», — адказаў той.
«Вось, у яго ёсць бульба, без праблем. Высокага ўзроўню чыноўнік. А звычайнаму чалавеку, у якога дзеткі маленькія... Мне бульба не трэба. Я яе знайду паўтара мяшка. Але ў мяне два ўчасткі. Хочаце паглядзець — калі ласка, хоць цяпер. Учора я паглядзеў і адзін, і другі ўчастак, бульбачка — залюбуешся. Акадэмія навук перадала насенне, я правяраю, што гэта за насенне. Усіх забяспечу бульбай, хто стаіць тут, дакладна», — адзначыў Аляксандр Лукашэнка. Ён параіў заняцца працай на зямлі замест таго, каб ныць, што чагосьці не хапае.
«Я разважаю, можа быць, як рэтраград і кансерватар нейкі. Але жыццё нічога не прыдумала іншага: для таго, каб нешта мець, трэба гарбаціцца», — адзначыў Прэзідэнт.
Кіраўніку дзяржавы і ўдзельнікам семінара далажылі аб вытворчай дзейнасці ААТ «Агракамбінат «Дзяржынскі» і перадавым вопыце будаўніцтва малочна-таварных комплексаў на прыкладзе МТК «Селішча-2». Удзельнікі мерапрыемства азнаёміліся з умовамі ўтрымання малочнай жывёлы на МТК, тэхналогіяй яе кармлення і даення, сучаснымі спосабамі ўнясення вадкіх арганічных угнаенняў. Прэзідэнт высока ацаніў убачанае. «Гэта будучае стагоддзе» — адзначыў ён і звярнуў увагу, што супрацоўнікі гаспадаркі даведаліся аб прыездзе Прэзідэнта напярэдадні вечарам, гэта значыць, навесці глянец у іх не было часу. Атрымліваецца, тут заўсёды парадак, як і павінна быць.
Спецыялістаў у нас шмат, пакуль кульгае арганізацыя
Аляксандр Лукашэнка патлумачыў, чаму так часта нагадвае пра важнасць выканальніцкай дысцыпліны. «Паверце, нутром адчуваю: кінем працаваць — будзем ваяваць», — адзначыў ён. І прывёў да прыкладу Украіну, дзе ўсё пачыналася з таго, што краіну «расцягнулі», і сацыяльная несправядлівасць, якая ўзнікла на гэтай глебе, прывяла да вайны. Беларускі лідар зрабіў акцэнт на тым, што яго словы пра дысцыпліну — не палітычная прапаганда і агітацыя. «Я хачу, каб вы, кіраўнікі перш за ўсё, пранікліся гэтым. Як працаваць, мы ведаем», — адзначыў ён.
Прэзідэнт нагадаў, што на яго ўзроўні разгледзелі ўсе сельскагаспадарчыя культуры, ацанілі вартасці і недахопы кожнай, выпрацавалі стратэгіі па іх вырошчванні. Цяпер надышла чарга жывёлагадоўлі. «Я вясковы чалавек, які пражыў нямала. І ведаю, што без прадуктаў харчавання, без адзення, самага неабходнага чалавек жыць не можа. А насельніцтва планеты ўвесь час расце. Мы ўмеем гэта рабіць. Давайце будзем развівацца. Мы — машынабудаўнічая краіна. У нас дастаткова школ створана па машынабудаванні, іншых кірунках — хіміі, нафтахіміі, нафтаперапрацоўцы. У нас шмат галін там, дзе мы ўмеем працаваць. Туды трэба інвеставаць і ствараць дадаткова новыя прадпрыемствы. Рабіць тое, што мы ўмеем», — заявіў Аляксандр Лукашэнка.
Кіраўнік дзяржавы звярнуў увагу, што гэта мерапрыемства важнае і для губернатараў, сярод якіх ужо палова — не аграрыі. Ён падкрэсліў, што яны прайшлі праз цэнтр, займалі высокія пасады, у сілавых структурах, прамысловасці, энергетыцы. І, нягледзячы на іх падрыхтоўку, ёсць і праблемы. «Спецыялістаў у нас шмат, пакуль кульгае арганізацыя. Паглядзім, што з гэтага кадравага эксперымента атрымаецца. Але не хапае дысцыпліны. Усё робім правільна. Але часам робім павольна, а часам не робім наогул. Выканальніцкая дысцыпліна — пытанне нумар адзін», — падкрэсліў беларускі лідар. Паводле слоў Аляксандра Лукашэнкі, у сельскай гаспадарцы цяпер бардак.
І не таму, што не хапае людзей, а таму што іх не арганізавалі і не прымусілі працаваць. Прэзідэнт адзначыў, што запрасіў кіраўнікоў мясцовых органаў улады на гэты семінар-нараду, таму што бачыць прыстойны аб’ём невыканання.
«Я вырашыў паступіць па-ваеннаму. У нас была ў арміі такая добрая формула: „рабі, як я“. Вось я вырашыў вам паказаць: я ад вас патрабую вось гэта, зрабіце так. Тады не будзе падзяжу жывёлы. Таму што, калі будзе падзеж жывёлы, як цяпер ці ўчора, будзе гэта ўсё працягвацца, мы прыйдзем да таго, што нам есці самім не будзе чаго. Таму не думайце, што гэта капрыз Лукашэнкі», — патлумачыў свой падыход кіраўнік дзяржавы. Ключавыя пытанні развіцця жывёлагадоўлі разглядалі на канкрэтных прыкладах са спецыялістамі.
Чаму трэба браць прыклад з «Дзяржынскага»
Генеральны дырэктар агракамбіната «Дзяржынскі» Уладзімір Лук’янаў падзяліўся перадавым вопытам свайго прадпрыемства. Перш за ўсё, варта адзначыць, што работа ў «Дзяржынскім» будуецца па поўным замкнёным цыкле — ад поля і фермы да перапрацоўкі і продажу, у тым ліку праз больш чым сотню фірменных магазінаў. Дарэчы, гаспадарка размешчана на тэрыторыі васьмі раёнаў Мінскай вобласці. «Па зямельных угоддзях гэта больш, чым раён. Па вытворчасці збожжа гэта тры савецкія раёны», — заўважыў Аляксандр Лукашэнка. Ён пацікавіўся, ці няма крыўд на цэнаўтварэнне. Дырэктар агракамбіната запэўніў, што ніякіх.
Прэзідэнт адзначыў, што вопыт «Дзяржынскага» трэба ўзяць на заметку адказным за пытанні цэнаўтварэння. Паводле яго слоў, вопыт агракамбіната трэба тыражаваць па ўсёй краіне.
Агракамбінат пастаянна развівае новыя кірункі. У планах — развіццё адкорму бычкоў на мяса, гэта значыць, вытворчасць высакаякаснай ялавічыны з экспартным патэнцыялам. Вытворчасць будзе адкрыта ў Слуцкім раёне. І ад гэтага выйграе і Слуцкі мясакамбінат (які далучыцца да агракамбіната «Дзяржынскі»), бо яго магутнасці будуць загружаныя. «Мы хочам правесці такі эксперымент па адкорме на 8-9 тысяч галоў у год. Адпрацаваць там механізмы, падыходы, сумесна з навукай прапрацаваць рацыёны. Распрацаваць тэхналогію, рэгламент вырошчвання, утрымання, кармлення і будаўніцтва гэтага комплексу і паднесці гэта як гатовы прадукт для ўсіх. Мы ўжо выбралі ўчастак, тэхналогію мы напісалі. Думаю, да Новага года ў нас ужо будзе праектнае рашэнне, і мы пачынаем гэты працэс. Такім чынам мы запоўнім наш мясакамбінат з забойнай пляцоўкай на 50-60 % уласнай сыравінай. Гэта дасць магчымасць якасна, як на асобную вытворчасць, палічыць выдаткі, рэнтабельнасць і атрымаць фінансавы вынік», — далажыў Уладзімір Лук’янаў. Калі эксперымент атрымаецца, ён будзе растыражаваны і ў іншых філіялах агракамбіната.
«Трэба імгненна гэта будаваць. Паралельна ўсё рабіць», — адзначыў Прэзідэнт і настроіў на тое, што тэрміны павінны быць максімальна сціснутымі. Цяпер у агракамбіната ў рэалізацыі 7 розных інвестпраектаў, якія фінансуюцца часткова за кошт уласных сродкаў і часткова — крэдытаў Банка развіцця. У тым ліку прадпрыемства задзейнічана ў рэалізацыі праграмы «Адзін раён — адзін праект». Паводле слоў Аляксандра Лукашэнкі, добра, што банк дапамагае тым прадпрыемствам, якія заўтра дадуць аддачу, але не варта на іх зацыклівацца: «Не значыць, што мы маліцца на яго павінны, таму што ёсць такое добрае прадпрыемства. Павінны развіваць і іншыя прадпрыемствы».
Прэзідэнт звярнуў увагу і на тое, што кіраўнікі такіх буйных і, самае галоўнае, паспяховых прадпрыемстваў, як «Дзяржынскі», павінны рыхтаваць сабе змену. «Заўтра цябе няма. Хто замест цябе?» — паставіў пытанне беларускі лідар. Гэта, вядома, датычыцца не толькі «Дзяржынскага» і Уладзіміра Лук’янава. «Нам трэба бачыць тут людзей, якія заўтра створаць такую гаспадарку. Калі мы будзем такое ствараць, у нас праблем не будзе з прадуктамі харчавання і іншымі пытаннямі», — сказаў беларускі лідар.
Чалавечы фактар, вакцынацыя, тэхналогіі — як вырашыць праблему з падзяжом жывёлы
Для таго каб вырашыць праблему з падзяжом жывёлы, трэба прымаць пад увагу шэраг фактараў. На іх у сваім дакладзе спыніўся старшыня Прэзідыума Нацыянальнай акадэміі навук Уладзімір Каранік. «Сітуацыя з падзяжом жывёлы некалькі стабілізавалася, але ўсё роўна не радуе. За пяць месяцаў гэтага года паказчык вырас на 1,7 % у параўнанні з аналагічным перыядам мінулага года», — адзначыў ён.
Адзін з ключавых фактараў падзяжу жывёлы — чалавечы фактар. Як правіла, расцёл адбываецца ноччу, і ў гэты час на многіх фермах дзяжураць супрацоўнікі, якія не заўсёды могуць прыняць роды ў каровы і паклапаціцца аб цяляці ў першыя хвіліны жыцця. Для гэтага неабходна належным чынам арганізаваць работу супрацоўнікаў. І зноў гаворка аб праславутай выканальніцкай дысцыпліне.
Важны фактар — фарміраванне імунітэту ў цялят, вакцынацыя. Па словах Уладзіміра Караніка, нярэдкія выпадкі, калі вакцыны прымяняюцца неадэкватна. Ён звярнуў увагу, што ў кожнай гаспадарцы павінен быць распрацаваны свой план вакцынацыі з улікам эпізаатычнай сітуацыі на месцы, але часта планы не абнаўляюцца альбо бяруцца шаблонна з суседніх гаспадарак. Парушаюцца спосабы і дозы ўвядзення, захоўвання і транспарціроўкі. З-за гэтага вакцыны не працуюць. Адзін з варыянтаў вырашэння праблемы — кантроль выканання патрабаванняў аб распрацоўцы і выкананні планаў вакцынацыі з улікам сітуацыі з боку раённых ветстанцый. Уладзімір Каранік таксама прапанаваў разгледзець магчымасць правядзення цэнтралізаванай закупкі вакцын на ўзроўні раёна або вобласці, каб забяспечыць абарону пагалоўя, незалежна ад фінансавага стану гаспадаркі. Прапанову цэнтралізаваць сістэму вакцынацыі жывёл назваў правільнай і намеснік Старшыні Усебеларускага народнага сходу Аляксандр Косінец. Ён таксама звярнуў увагу на вытворчасць айчынных вакцын і кантроль за іх якасцю.
Уладзімір Каранік падкрэсліў неабходнасць карэктна выбудаваць работу ветэрынарных урачоў. Напрыклад, цэнтралізаваць сістэму, каб раённая ветстанцыя забяспечвала ветэрынарнае суправаджэнне па ўсім раёне.
Па словах кіраўніка НАН, на сёння лабараторная дыягностыка інфекцыйных захворванняў не ў поўнай меры забяспечвае ветэрынарную службу неабходнай інфармацыяй. Частка методык або састарэла, альбо валодае недастатковай дакладнасцю. І тут ветэрынарам можа дапамагчы медыцына. Уладзімір Каранік нагадаў, што падчас пандэміі COVІD-19 былі значна пашыраны магчымасці лабараторнай службы ПЛР-дыягностыкі, якія дазваляюць хутка выяўляць розныя антыгены. У найбліжэйшы час спецыялісты прадставяць прапановы, як зрабіць лабараторную дыягностыку ў ветэрынарыі больш аператыўнай і сучаснай.
Асобна звярнулі ўвагу на эфектыўнасць вырошчвання некаторых парод буйной рагатай жывёлы. Разгледзелі гэта пытанне на прыкладзе галштынскай пароды. Гэта адна з самых прадукцыйных малочных парод у свеце, але толькі пры строгім захаванні нормаў кармлення і рацыёну.
«Мы павінны прымаць рашэнне: або па-ранейшаму гэтак жа інтэнсіўна выкарыстоўваем гэтых кароў незалежна ад таго, ёсць тэхналогіі ці не, альбо працуем над генетычнай разнастайнасцю», — адзначыў Уладзімір Каранік. У Беларусі ёсць таксама досвед работы з дацкай чырвонай пародай кароў, іх вырошчваюць у сельгаспрадпрыемстве «Вусце» — гэта хоць і менш прадукцыйная, але больш устойлівая парода. Кіраўнік НАН прапанаваў узяць частку пагалоўя са статка і паспрабаваць папрацаваць з гэтай пародай на базе адной з перадавых гаспадарак краіны ў Брэсцкай або Гродзенскай абласцях. Прэзідэнт такі падыход падтрымаў.
Аляксандр Лукашэнка зрабіў акцэнт на тым, што ўсе выказаныя прапановы трэба аформіць у канкрэтныя рашэнні. Паводле яго слоў, важна не проста чарговы раз слухаць размовы і лекцыі аб прадухіленні падзяжу жывёлы, але і прымаць рэальныя меры. Гэта датычыцца цэнтралізацыі ветэрынарнай службы, прымянення напрацовак аховы здароўя ў ветэрынарыі — Прэзідэнт патрабуе ад спецыялістаў выпрацаваць адзінае меркаванне і ўнесці канкрэтныя прапановы. Ён запэўніў, што па разумных, вывераных ідэях рашэнне прымаецца на працягу сутак.
Аляксандр Партной, кіраўнік навукова-практычнага цэнтра НАН Беларусі па жывёлагадоўлі, адзначыў, што шлях прамысловай вытворчасці ў жывёлагадоўлі быў абраны абсалютна правільны. «Мы сёння не можам вярнуцца да дробнатаварных ферм і займацца вытворчасцю малака на гэтых фермах. Для таго каб выконваць тэхналогіі, мы павінны будаваць гэтыя сучасныя прамысловыя комплексы», — сказаў Аляксандр Партной. Але, звярнуў увагу Прэзідэнт, калі хтосьці хоча займацца фермерствам і мець 20, 30, 50 галоў жывёлы — то няма ніякіх праблем.
Кіраўнік навукова-практычнага цэнтра па жывёлагадоўлі падкрэсліў, што тэхналогіі ўтрымання жывёл, догляду маладняка даўно вядомыя. Самае галоўнае — перадаць іх работнікам, данесці, што трэба працаваць па тэхналогіях і правілах. Па словах Аляксандра Партнога, з гэтым нярэдка бываюць складанасці, але ў цэлым пытанне вырашаецца, і работнікі гатовыя вучыцца таму, чаго не ведалі, і працаваць па правілах.
«Вось вам паўнамоцтвы, але і адказнасць. Рабіце»
Прэзідэнт звярнуў увагу, што часы мяняюцца, тэхналогіі мяняюцца, і веды нават спецыялістам трэба абнаўляць і папаўняць. Але без дысцыпліны і арганізацыі — гэта ўсё пустая размова. Аляксандр Лукашэнка адзначыў, што заўтра мы не вырабім патрэбную колькасць вакцын і лекаў. «Паўстае пытанне, якое ляжыць на паверхні: „Хто пацікавіўся якасцю?“ Калі б мы закуплялі патрэбнай якасці і патрэбнае, то, напэўна, быў бы і вынік зусім іншы. Але мы і гэта не пракантралявалі», — падкрэсліў кіраўнік дзяржавы. Паводле яго слоў, трэба прымаць рашэнні там, дзе гэта сапраўды патрэбна і дзе прынясе рэальную карысць. «Вы на месцах людзі, якія пасля Прэзідэнта за гэта адказваеце. А я дакладней скажу: разам з Прэзідэнтам. Рабіце. Не ведаеце як, — ідзіце, вучыцеся. Вы займаеце вялікія пасады, вы несяце пэўную адказнасць. Я вас стаўлю нароўні з Прэзідэнтам. Вы прасілі паўнамоцтвы — вось вам паўнамоцтвы, але і адказнасць. Зрабіце так, як мы сёння гэта ўбачылі», — звярнуўся кіраўнік дзяржавы да ўдзельнікаў мерапрыемства. Ён падкрэсліў, што няма значэння, якія будуць прымяняцца метады работы — старыя ці сучасныя, галоўнае, каб былі вынік і парадак. І яшчэ, папярэдзіў Прэзідэнт, размовы пра тое, што кіраўнікі не ведаюць, як рабіць, пасля гэтага семінара не прымаюцца. «Вы ведаеце, што такое малочнатаварны комплекс. Гэта наша будучыня. Гэта грошы нашых сялян, таму што малако сёння рэнтабельнае. Будзе малако, будзе і мяса, ялавічына», — адзначыў Аляксандр Лукашэнка. Ён звярнуў увагу, што ў цэлым з ялавічынай сёння праблем няма. Ёсць некаторыя пытанні па свініне, але і яны вырашальныя.
«Давайце падыходзіць разумна»
Кіраўнік дзяржавы даручыў самым сур’ёзным чынам падысці да пытання будаўніцтва свінагадоўчых комплексаў. І паставіў задачу дакладна вызначыць: што больш мэтазгодна — пабудаваць комплекс на 100 тысяч галоў (пры такой канцэнтрацыі ў разы вырастае рызыка ўзнікнення хвароб і інфекцый) або чатыры комплексы на 25 тысяч галоў (у такіх комплексах прасцей выбудаваць работу). Трэба таксама вывучыць усе аспекты адзначыў Прэзідэнт. Напрыклад, наяўнасці гарантаванай кармавой базы, захавання выканальніцкай дысцыпліны і тэхналогій. Аляксандр Лукашэнка патрабуе ўсё ўважліва вывучыць, пралічыць, прааналізаваць і прыняць канкрэтнае рашэнне.
Віцэ-прэм’ер Юрый Шулейка і старшыня Гомельскага аблвыканкама Іван Крупко адзначылі, што будаўніцтва «статысячніка» дасць большую эканамічную аддачу. Яны вынеслі на разгляд кіраўніка дзяржавы прапанову ўзвядзення такога вялікага комплексу ў Гомельскай вобласці.
«Давайце падыходзіць разумна. Я буду рады і шчаслівы, калі ў Гомельскай вобласці мы пабудуем нейкія свінакомплексы і яны там будуць паспяховыя, — прывёў прыклад кіраўнік дзяржавы. — Таму што нам Гомельскую вобласць трэба развіваць. А гэта — развіццё. Але калі яны не могуць — няма чаго туды і хадзіць».
Аляксандр Лукашэнка звярнуў увагу на яшчэ адзін аспект, звязаны з будаўніцтвам комплексаў. «Калі мы канцэнтруем вытворчасці, мы збіраем у кучу людзей. Часам мы збіраем неабдумана. І мы губім тыя вёскі, якія раней былі цэнтрамі тых гаспадарак, якія мы далучылі. Раней была вёска, цэнтр гаспадаркі. Потым аб’ядналі дзве гаспадаркі, аграгарадок у адной, а другая ўжо гіне, а магла б быць фермачка, комплекс, але не такі, не паўтары тысячы, а на 300-400 галоў дойнага статка. І людзі б там жылі, і жыллё б будавалі, — звярнуў увагу ён. — Каб захаваць вёскі, трэба будаваць вытворчасць каля вёскі. Трэба думаць, трэба не губіць буйныя вёскі».
«Трэба рухацца і займацца справай»
Прэзідэнт пацікавіўся ў губернатара Міншчыны Аляксея Кушнарэнкі станам спраў і настроем у рэгіёне. Кіраўнік дзяржавы адзначыў, што гэта самая складаная вобласць краіны, таму што тут усё ёсць. Старшыня аблвыканкама адказаў, што ёсць праблема з падзяжом буйной рагатай жывёлы. Але ў цэлым сітуацыя кантраляваная і ўжо прымаюцца меры для вырашэння гэтай праблемы. Самыя праблемныя гаспадаркі знаходзяцца на кантролі.
Прэзідэнт спытаў, якую галоўную праблему Аляксей Кушнарэнка як новы чалавек у губернатарскім складзе вызначыў для сябе. Кіраўнік Мінскай вобласці назваў адсутнасць дысцыпліны, тэхналагічнай і арганізацыйнай. Аляксандр Лукашэнка заўважыў, што ў яго няма перадузятага стаўлення да таго ці іншага рэгіёна, але калі недзе будзе абыякавасць і не будзе дысцыпліны — то і спытае з кіраўнікоў адпаведна.
«Вы ведаеце, што трэба рабіць і як трэба рабіць. Трэба рухацца і займацца справай», — адзначыў Прэзідэнт.
Падводзячы вынікі семінара-нарады, Аляксандр Лукашэнка заўважыў, што ўзор «Дзяржынскага» — гэта тое, да чаго павінны імкнуцца ўсе сельгасарганізацыі. І гэта цалкам магчыма. Але трэба працаваць. «Я вас не ўгаворваю. Вы людзі дзяржаўныя. Я вызначаю курс — вы яго выконваеце. Я вам кажу: разам са мной давайце станавіцца ў рад і дзейнічаць, нягледзячы на тое, што мы кагосьці там пакрыўдзім. Ды мы павінны далікатна ўсё рабіць, старацца нікога не пакрыўдзіць. Але трэба дзейнічаць. Патрэбен вынік», — арыентуе беларускі лідар.
Валерыя СЦЯЦКО
Фота: БелТА
Мінскі раён
