Па словах дырэктара прадпрыемства, Прэм’ер-міністр стаў натхняльнікам праекта па распрацоўцы малагабарытнага шасі. «Ён актыўна цікавіцца яго прасоўваннем. У праект уключана дастатковая колькасць прадпрыемстваў, перш за ўсё МАЗ, які з’яўляецца асноўным лакаматывам вытворчасці паўнапрываднага малагабарытнага шасі», — удакладніў Алег Дзярабін.

Аляксандр Турчын сапраўды актыўна цікавіўся ходам падрыхтоўкі да паўнавартасных выпрабаванняў і асваення гэтага шасі як спецыяльнага аўтамабіля для патрэб МНС Беларусі. 

Што датычыцца новых распрацовак прадпрыемства, то тэма пажарных аўталесвіц пасля вытворчасці ўнікальнай 52-метровай набыла развіццё, але ўжо для патрэб МНС Расійскай Федэрацыі. «Перш за ўсё мы распрацавалі больш лёгкую і простую 30-метровую лесвіцу. Яна прайшла выпрабаванні, і цяпер ідуць фінальныя падрыхтоўчыя работы. Гэта для нас новы прадукт. Самае дзіўнае, што раней мы рухаліся па нарастаючай — лесвіцы станавіліся ўсё большымі і складанымі, а тут прыйшлося працаваць у адваротным напрамку: максімальна спрошчаны прадукт», — расказаў Алег Дзярабін.

Другі кірунак работы ТАА «ПАЖСНАБ» — прымяненне напрацовак, атрыманых сумесна з МАЗам, для вытворчасці пажарных і аварыйна-выратавальных аўтамабіляў на шасі МАЗ з працяглымі тэрмінамі эксплуатацыі. «Цяпер калегі з КАМАЗа разам з намі распрацоўваюць шэраг такіх аўтамабіляў на шасі КАМАЗ. Гэта асноўная работа, якая ідзе цяпер», — падкрэсліў дырэктар.

Гаворачы аб выніках 2025 года, Алег Дзярабін адзначыў, што рост вытворчасці склаў каля 17 % да ўзроўню 2024 года, а выручка вырасла прыкладна на 35 %. «У вытворчай лінейцы рэзка павялічыўся аб’ём больш складанай тэхнікі — гэта мабільныя шпіталі і пункты кіравання. Такія заказы мы актыўна вырабляем на экспарт. Летась асвоілі выпуск тэхнікі для патрэб парадку васьмі дзяржаў, таму ацэньваю 2025-ы як вельмі паспяховы», — заўважыў кіраўнік прадпрыемства.

Паводле яго слоў, самае галоўнае, што ТАА «ПАЖСНАБ» увайшоў у 2026 год з партфелем заказаў аб’ёмам амаль 87 % ад усёй вытворчасці мінулага года. «Гэта лепшы паказчык па напрацоўках прадпрыемства, — дадаў ён. — Супрацоўніцтва з МАЗам паскараецца і нарошчвае абароты, асабліва для экспарту».

ТАА «ПАЖСНАБ» — вытворца пажарнай і аварыйна-выратавальнай тэхнікі: пажарных аўтацыстэрнаў, спецыяльных пажарных аўтамабіляў, пажарных аўталесвіц, каленчатых пад’ёмнікаў і пенапад’ёмнікаў. Прадпрыемства пачало сваю дзейнасць у 2002 годзе.