Як паведаміла Упраўленне ўнутраных спраў Гродзенскага аблвыканкама, днямі пажылой жыхарцы абласнога цэнтра патэлефанаваў нібыта ўчастковы інспектар міліцыі. Ён папярэдзіў, што пачасціліся выпадкі махлярства, і параіў не перадаваць свае асабістыя даныя, коды ад банкаўскіх карт і іншыя звесткі невядомым людзям. Праз некалькі дзён пенсіянерцы зноў паступіў тэлефонны званок. На гэты раз незнаёмец прадставіўся супрацоўнікам сотавай сувязі і паведаміў, што для падаўжэння дагавора неабходна назваць код з СМС, што жанчына і зрабіла. Неўзабаве патэлефанаваў ілжэўчастковы і пачаў запалохваць пенсіянерку, што яна нібыта стала фігурантам крымінальнай справы аб спансіраванні экстрэмісцкай дзейнасці. Каб не дапусціць праследавання з боку праваахоўных органаў, жанчыне параілі «задэклараваць» усе яе наяўныя грошы. Ёй нават паабяцалі прадаставіць спецыяліста, які дапаможа гэта зрабіць.

І сапраўды, неўзабаве да пенсіянеркі прыйшоў малады чалавек, які забраў грошы і паспрабаваў перавесці іх на рахунак аферыстаў праз сваю карту. Але банк гэтую аперацыю расцаніў як падазроную і заблакіраваў рахунак. 

Супрацоўнікі Кастрычніцкага РУУС Гродна затрымалі кур’ера. У далейшым грашовыя сродкі будуць вернуты пацярпелай. Дарэчы, па такой жа схеме зламыснікі ўцягнулі ў сваю злачынную дзейнасць і гэтага кур’ера.

Ва УУС нагадалі, што супрацоўнікі органаў унутраных спраў ніколі не просяць грамадзян дэклараваць іх грашовыя сродкі. Дэклараванне праводзіцца выключна ў рамках падатковага заканадаўства пры справаздачы аб даходах або фінансавай дзейнасці. У крымінальным працэсе паняцця «дэклараванне» не існуе. Усе аператыўна-вышуковыя мерапрыемствы праводзяцца без выкарыстання асабістых грошай грамадзян. Калі вы чуеце фразу: «Вам неабходна задэклараваць грошы», значыць, з вамі размаўляе махляр.

«Таксама важна ведаць, што калі ў ходзе расследавання ўзнікае неабходнасць правядзення вобыску, органы міліцыі ніколі не паведамляюць пра гэта загадзя. Мэта вобыску — раптоўнае выяўленне доказаў, якія падазраваны можа паспрабаваць схаваць або знішчыць. Папярэджанне аб праверцы супярэчыць самой сутнасці следчага дзеяння», — адзначыў намеснік начальніка УУС аблвыканкама Вячаслаў Дземідовіч.