Праект стартаваў у пачатку гэтага года пад эгідай Гродзенскага абласнога Савета дэпутатаў і Гродзенскага абласнога інстытута развіцця адукацыі. Яго мэтавая аўдыторыя — педагогі. Адукацыйны праект праходзіць у форме трэнінгаў, накіраваных на фарміраванне грамадзянскасці і патрыятызму ў моладзі праз павышэнне прафесійнага майстэрства педагогаў. Сесія адбылася на базе гімназіі № 10 імя мітрапаліта Філарэта г. Гродна. Вопытам абласнога праекта ўжо зацікавіліся на міжнародным узроўні.
Ініцыятары праекта імкнуцца данесці думку, што школа — гэта не проста месца для навучання. Тут фарміруецца будучы грамадзянін, і адбываецца гэта не толькі ў рамках гуманітарных дысцыплін: грамадазнаўства ці гісторыі. Нават урок матэматыкі можа несці ў сабе патрыятызм. І праект упэўнена набірае абароты, дэманструе першыя важкія вынікі. Унікальная ініцыятыва ўжо паспела ахапіць чатыры рэгіёны Прынямоння. Сімвалічны старт маштабнаму марафону быў дадзены ў Кастрычніцкім раёне горада Гродна. Пасля ўдзельнікаў прымаў Навагрудак, а цяперашняя, ужо пятая па ліку сесія праекта цалкам прысвечана тэме вытокаў малой радзімы. Арганізатары ставяць перад сабой амбіцыйную мэту: да канца года гэтае незвычайнае педагагічнае падарожжа павінна ахапіць абсалютна ўсе раёны Гродзенскай вобласці.
— Самі ўдзельнікі называюць тое, што адбываецца ў рамках праекта сапраўдным педагагічным цудам. У яго ляжыць жывое, шчырае ўзаемадзеянне прафесіяналаў і настаўнікаў-пачаткоўцаў. Прызнаныя метадысты і педагогі вышэйшай кваліфікацыйнай катэгорыі дзеляцца з маладымі калегамі сістэмным падыходам, які дае магчымасць павышаць не толькі якасць прадметных ведаў, але і гадаваць сапраўдных грамадзян і патрыётаў. Унікальнасць методыкі заключаецца ў тым, што выхаваўчы патэнцыял раскрываецца не толькі на ўроках гісторыі, грамадазнаўства ці літаратуры. Педагогі на практыцы даказваюць, што выхоўваць любоў да Радзімы можна і на ўроках геаграфіі, біялогіі і нават працоўнага навучання, — расказала старшыня Гродзенскага абласнога Савета дэпутатаў, старшыня Гродзенскага абласнога аддзялення Беларускай партыі «Белая Русь» Алена Пасюта.
Супольнасць аднадумцаў
Праект даўно перарос рамкі звыклых школьных семінараў, стварыўшы вакол сябе адзінае і аўтарытэтнае адукацыйнае асяроддзе. Сесіі сталі адкрытай пляцоўкай, дзе ў адным шэрагу аб’яднаны педагогі, вучні, бацькоўская грамадскасць і прадстаўнікі ўлады. У якасці лідараў меркаванняў на сустрэчах працуюць дэпутаты мясцовых Саветаў і парламентарыі. Яны знаёмяць аўдыторыю з ключавымі напрамкамі дзяржаўнай палітыкі і заканадаўчымі новаўвядзеннямі, істотна пашыраючы інфармацыйную прастору ўдзельнікаў. Пры гэтым выкарыстанне нестандартных форм работы, такіх як тэлемасты і адкрытыя дыскусіі, дае магчымасць атрымліваць прамую зваротную сувязь ад жыхароў і аператыўна вырашаць пытанні па ўдасканаленню навучальнага працэсу на месцах.
Поспех гродзенскай ініцыятывы аказаўся настолькі маштабным, што многія маладыя педагогі літаральна ідуць за арганізатарамі па ўсёй карце вобласці. Яны імкнуцца не прапусціць ніводнай сесіі, прызнаючы, што менавіта тут на практыцы спасцігаюць грані прафесійнага майстэрства і развіваюць уласныя таленты. Нягледзячы на тое, што праект задумваўся як абласны, ім ужо актыўна цікавяцца за межамі Беларусі. Алена Пасюта расказала, што паступаюць прапановы маштабаваць гэты вопыт і прэзентаваць напрацаваную сістэму на бліжэйшым з’ездзе краін СНД. Гэта дае ўсе падставы меркаваць, што ў будучыні ўнікальны гродзенскі праект выйдзе на міжнародны ўзровень.
Кожная такая сесія прысвечана пэўнай тэматыцы. Як расказала рэктар Гродзенскага абласнога інстытута развіцця адукацыі Святлана Сяргейка, у Кастрычніцкім раёне горада Гродна ўдзельнікі марафону гаварылі аб мужнасці, у Лідзе шукалі ключы да вобраза жанчыны-стваральніцы, у Навагрудку фарміравалі каштоўнасны фундамент сям’і, а ў Ваўкавыску абаранялі гістарычную памяць.
— Любоў да Радзімы заўсёды прарастае з асабістых, глыбокіх вытокаў. Яна пачынаецца з простых і блізкіх кожнаму рэчаў: паху маміных пірагоў, старой фатаграфіі ў сямейным альбоме, шолаху лісця ў школьным двары і гісторыі той маленькай вуліцы, на якой рос чалавек. Самыя першыя пахі роднай зямлі і першыя гукі гаворкі фармуюць наш псіхаэмацыйны код. Менавіта таму на педагогаў ускладзена ўнікальная, святая місія — умацаваць гэтыя карані і зрабіць так, каб кожны вучань пабудаваў свой жыццёвы дом ва ўласных вытокаў, бо Малая Радзім — гэта калыска душы, — адзначыла Святлана Сяргейка.
Рэктар прыгадала словы Мітрапаліта Філарэта аб тым, што лёс Радзімы — гэта лёс кожнага з нас. Сапраўдная гісторыя пішацца зусім не ў вялікіх кабінетах, яна пішацца штодня ля простай школьнай дошкі. Галоўная задача такіх рэгіянальных сустрэч — натхніць маладых спецыялістаў, будучых дырэктараў і вопытных настаўнікаў, дапамагчы ім пераняць прафесійныя сакрэты ў прызнаных майстроў. Гэта дазволіць знайсці падыход да сучаснага лічбавага пакалення і зрабіць так, каб яны ганарыліся сваёй зямлёй і стваралі будучыню менавіта тут.
Праца спікераў пачалася з выступу дэпутата Палаты прадстаўнікоў Нацыянальнага сходу Рэспублікі Беларусь Алега Раманава. Ён казаў і важнасці захавання чалавечнасці і высокай культуры асобы. І роля адукацыі ў гэтым працэсе велізарная. Чалавек, які ўсведамляе значнасць сваёй краіны, яе мірнага суіснавання і прагрэсу, а таксама злучае з ёй свае жыццёвыя перспектывы, фармуецца праз адукацыю, культуру і прывіццё грамадзянскай адказнасці.
Вераніка КАЗЛОЎСКАЯ
фота Гродзенскай праўды
