У РНПЦ праходзяць лячэнне дзеці ад 0 да 18 гадоў з усёй краіны, а таксама асобныя катэгорыі дарослых да 30 гадоў. Сярод пацыентаў — трохгадовая Насця з Бабруйска. Яе бацька Яўген Булава расказаў, што дыягназ «лейкоз» яго дачцэ паставілі летам гэтага года. «З тых часоў лечымся ў Магілёве. Сюды прыязджаем пракапваць лекі. Усе неабходныя працэдуры атрымліваем», — адзначыў Яўген Булава.
У Бабруйску Насцю чакаюць мама і тры сястры. Нягледзячы на хваробу і знаходжанне ў бальніцы, дзяўчынка не сумуе і ўсміхаецца. «Насці, як той казаў, трэба аддаць належнае: трымаецца, весяліцца, не сумуе», — сказаў яе бацька.
Наведваючы РНПЦ дзіцячай анкалогіі, гематалогіі і імуналогіі, Старшыня Савета Рэспублікі Наталля Качанава павіншавала юных пацыентаў установы з надыходзячымі святамі, пажадала здароўя, шчасця і поспехаў. Яна адзначыла, што РНПЦ ужо даўно знаходзіцца ў полі зроку сенатараў. Паводле яе слоў, ва ўстанове атрымліваюць лячэнне не толькі маленькія беларусы, але і дзеці з-за мяжы. «Цэнтр паказвае добрыя вынікі ў лячэнні нашых дзяцей, — канстатавала Наталля Качанава. — У гэтыя перадсвяточныя дні мы прыязджаем сюды для таго, каб павіншаваць са святам калектыў, выказаць удзячнасць і падзяку супрацоўнікам гэтага цэнтра».
Паводле слоў спікера Савета Рэспублікі, супрацоўнікі РНПЦ дзіцячай анкалогіі, гематалогіі і імуналогіі робяць вялікую справу — ратуюць жыцці нашых дзяцей. «Яны працуюць натхнёна і з душой, з добрым сэрцам», — падкрэсліла Наталля Качанава.
Яна таксама адзначыла, што, наведваючы ўстанову аховы здароўя ў любы час, людзі адзначаюць выдатны калектыў тут. «Людзі заўсёды дзякуюць супрацоўнікам гэтага цэнтра. Няважна, хто па пасадзе: альбо гэта галоўны ўрач, альбо супрацоўнік, які працуе ў гардэробе... Тут працуюць менавіта такія людзі, якія ўсю душу, усё сэрца аддаюць нашым маленькім дзеткам, — падкрэсліла Старшыня Савета Рэспублікі. — І, вядома, гэтымі днямі вельмі хочацца, каб дзеці адчулі шчасце, радасць ад свята, якое, без сумневу, чакаюць усе».
Спікер прызналася, што пасля сустрэчы з маленькімі пацыентамі РНПЦ на душы становіцца цёпла і радасна ад таго, наколькі пазітыўныя гэтыя дзеці. «Яны настолькі рады таму, што будзе свята, будзе цуд, будзе шчасце... І мы рады таму, што датычныя і разам з імі можам падзяліць іх радасць», — падагульніла Наталля Качанава.
Данііл ХМЯЛЬНІЦКІ.
ФОТА БЕЛТА.
