Урадам зменены механізм ільготнага спажывецкага крэдытавання «На родныя тавары». Пастановай Савета Міністраў ад 25 сакавіка 2026 года № 139 уводзіцца патрабаванне па наяўнасці ў вытворцаў тавараў, зацікаўленых у іх рэалізацыі ў рамках ільготнай крэдытнай лініі «На родныя тавары», сертыфікатаў прадукцыі ўласнай вытворчасці. Такія сертыфікаты выдаюцца арганізацыямі БелГПП. Для ўдзелу ў крэдытаванні захоўваецца дзеючы пералік тавараў (35 таварных груп). Пры гэтым канкрэтны пералік іх вытворцаў не прадугледжваецца.
«Такім чынам, выключаецца пералік вытворцаў пры захаванні пераліку ўсіх таварных груп. Гэта значыць на сёння любы вытворца, які мае сертыфікат прадукцыі ўласнай вытворчасці, выдадзены Беларускай гандлёва-прамысловай палатай, можа ўдзельнічаць у крэдытаванні „На родныя тавары“, але толькі на групы тавараў, устаноўленыя пастановай. Такім чынам, пашыраецца пералік вытворцаў, могуць удзельнічаць усе», — сказала Наталля Мельнікава.
З моманту ўступлення ў сілу пастановы аб ільготным спажывецкім крэдытаванні практычна штодня ў МАРГ паступалі звароты ад беларускіх вытворцаў аб уключэнні ў гэты дакумент. «Было прынята рашэнне пералік вытворцаў выключыць, каб кожны вытворца, які сёння мае сертыфікат прадукцыі ўласнай вытворчасці, мог удзельнічаць у дадзеным крэдытаванні», — дадала начальнік упраўлення арганізацыі гандлю і грамадскага харчавання.
Таксама прадастаўляецца магчымасць ільготнага крэдытавання паслуг па санаторна-курортным лячэнні, якія аказваюцца санаторна-курортнымі арганізацыямі, што знаходзяцца на тэрыторыі Беларусі. «Фізічная асоба можа набыць пуцёўкі ў санаторна-курортнай арганізацыі. Яна павінна быць абавязкова зарэгістраваная, і ў яе павінна быць пасведчанне аб дзяржаўнай атэстацыі, выдадзенае Рэспубліканскім цэнтрам па аздараўленні і санаторна-курортным лячэнні насельніцтва», — адзначыла Наталля Мельнікава.
Паводле яе слоў, запатрабаванасць ільготнага спажывецкага крэдытавання «На родныя тавары» не зніжаецца. З пачатку дзеяння праграмы выдадзена 254 тыс. крэдытаў на суму 1,4 млрд рублёў. Практычна 50 % прыпадае на мэблю, на другім месцы домакамплект.
