Супрацоўнікі Фрунзенскага РУУС затрымалі 61-гадовага жыхара Мінска, які стаў ахвярай і пасыльным тэлефонных аферыстаў.

Спачатку мужчыну пераканалі аформіць на сябе крэдыт, а пасля забраць грошы ў 81-гадовай пенсіянеркі. Ён думаў, што дапамагае ёй зберагчы сродкі ад зламыснікаў і пагадзіўся на гэта.

На самой справе жанчыну падманулі па вядомай ужо схеме «Энергазбыт»: паведамілі аб неабходнасці замены лічыльніка, выманілі пашпартныя дадзеныя, затым ілжэследчы паведаміў, што яе звесткі выкарыстоўваюцца ў злачынных мэтах. Баючыся стаць фігуранткай крымінальнай справы, пацярпелая пагадзілася «задэклараваць усе наяўныя» і аддала 190 тысяч рублёў.

Вядома, што мужчына таксама прыняў грошы ад іншага кур’ера, адвёз усю суму (звыш 250 тысяч рублёў) у суседнюю краіну і перадаў невядомаму.

Следчымі распачаты крымінальныя справы за махлярства

Намеснік начальніка аддзела крымінальнага вышуку Фрунзенскага РУУС г. Мінска Сяргей Кухарчык нагадвае: праваахоўнікі, супрацоўнікі банкаўскіх і іншых устаноў не тэлефануюць грамадзянам па працоўных пытаннях у месенджарах, не просяць аказаць садзейнічанне ў выкрыцці і затрыманні зламыснікаў, падоўжыць дамову на аказанне паслуг або ўзяць крэдыт. Калі вам паступіў падобны званок — неадкладна спыніце размову і паведаміце пра тое, што адбылося, у міліцыю.