Цэнтралізаваны экзамен пройдзе ў 144 пунктах, а цэнтралізаванае тэсціраванне — у асноўныя дні ў 40 пунктах і ў дадатковыя дні ў 6 пунктах. «Колькасць гэтых пунктаў у параўнанні з мінулым годам не змянілася. Такі ж трэнд у нас назіраецца і ва ўступнай кампаніі. У мінулым і пазамінулым гадах у нас былі асноўныя навацыі, якія сябе дастаткова добра зарэкамендавалі», — адзначыў Сяргей Пішчоў.

Асаблівасць уступнай кампаніі гэтага года — адсутнасць значных змен, падкрэсліў ён. «Тыя рашэнні, якія былі прынятыя, сябе апраўдалі. Калі казаць пра ВНУ, то гэта і вынас за рамкі асноўнага прыёму дзяцей на ўмовах мэтавай падрыхтоўкі, і залічэнне выпускнікоў профільных класаў, якія таксама праходзяць прыём дакументаў у першыя дні ўступнай кампаніі. Залічэнне дзяцей-пераможцаў універсітэцкіх алімпіяд у рэгіянальныя ВНУ таксама вынесены за рамкі асноўнага прыёму. Сёлета інфармаванне праходзіць у больш спакойным рэжыме, таму што ўжо новага нічога няма», — заўважыў начальнік.