«Вынікі, якія паказалі нашы выпускнікі на рэпетыцыйным экзамене, карэлююць у асноўным з іх чвартковымі адзнакамі, якія былі на той момант», — адзначыў Сяргей Пішчоў.

Першы намеснік начальніка галоўнага ўпраўлення па адукацыі Брэсцкага аблвыканкама Таццяна Савіч дадала, што ў Брэсцкай вобласці чатыры рэгіянальныя ВНУ з’яўляюцца пунктамі правядзення ЦЭ і ЦТ. «Рэпетыцыі — гэта таксама своеасаблівая прафарыентацыя. Я размаўляла сёлета на рэпетыцыі з рабятамі, якія здавалі біялогію, хімію. Яны кажуць, што да апошняга не маглі вызначыцца, але, наведаўшы ВНУ, яны дакладна вырашылі, што хочуць паступаць менавіта ў гэты ўніверсітэт. У прыватнасці, было па тэхнічным універсітэце так», — адзначыла яна.

Таццяна Савіч сказала, што была на рэпетыцыйным экзамене ад пачатку і да канца, каб паглядзець, калі пачнуць выходзіць першыя абітурыенты. «Першае дзіця выйшла праз 40 хвілін. Я ў яго спытала, ці справіўся ён з усімі заданнямі. Ён сказаў, што так, справіўся з усімі. Пры гэтым абітурыент дадаў, што для яго не гэтак важна было выканаць усе заданні, колькі паглядзець, як запоўніць бланк адказу, паглядзець, якая атмасфера, і гэтак далей. Гэта значыць ён пайшоў для сябе некалькі з іншай устаноўкай», — расказала прадстаўніца Брэсцкай вобласці.