Прадстаўнік Мінадукацыі адзначыў, што мэтавая падрыхтоўка ў першую чаргу накіравана на забеспячэнне кадравай патрэбы арганізацый-заказчыкаў кадраў. «Пералік, які зацверджаны пастановай Міністэрства адукацыі, вызначае тыя спецыяльнасці, на якія з году ў год найбольш масава паступаюць абітурыенты-мэтавікі. Гэта інжынерныя спецыяльнасці, спецыяльнасці педагагічнага, медыцынскага профілю, спецыяльнасці аграпрамысловага комплексу. У пералік увайшла большасць спецыяльнасцяў агульнадзяржаўнага класіфікатара «Спецыяльнасці і кваліфікацыі», гэта значыць практычна па ўсіх профілях ёсць спецыяльнасці даступныя для паступлення мэтавікоў», — сказаў Сяргей Пішчоў. 

Паводле яго слоў, для абітурыентаў і арганізацый-заказчыкаў кадраў нічога не змянілася. «Мэтавы прыём будзе праводзіцца гэтак жа, як і летась, у асобныя тэрміны — перад асноўнай уступнай кампаніяй. У цяперашні час ужо ідзе падбор будучых работадаўцаў для заключэння мэтавых дагавораў. Падрабязную інфармацыю можна атрымаць непасрэдна ў навучальных установах, якія актыўна інфармуюць абітурыентаў, праводзячы дні адкрытых дзвярэй, круглыя сталы, размяшчаючы інфармацыю на сваіх сайтах. Такім чынам, для абітурыентаў умовы засталіся нязменнымі — усе правілы, якія дзейнічалі летась, захоўваюцца і ў гэтым. Проста быў сістэматызаваны пералік спецыяльнасцяў, найбольш запатрабаваных як эканомікай і сацыяльнай сферай нашай краіны, так і абітурыентамі», — падкрэсліў начальнік галоўнага ўпраўлення.

Мэтавікі, як і ў мінулыя гады, у гэту прыёмную кампанію будуць здаваць уступныя іспыты ў выбраным універсітэце. Пералік профільных прадметаў зацверджаны пастановай Мінадукацыі. Пытанні іспытаў размешчаны на сайтах адукацыйнага ведамства і ВНУ.

«У мінулым годзе пры плане прыёму каля 6,6 тыс. чалавек на мэтавыя месцы было пададзена больш за 8 тыс. дакументаў ад абітурыентаў. Мэтавыя месцы сапраўды запатрабаваныя. Адзначу, што пры прыёме на ўмовах мэтавай падрыхтоўкі абавязкова павінен быць забяспечаны конкурс кожным заказчыкам кадраў, які заявіў і зацвердзіў сваё мэтавае месца. Гэта значыць, прадпрыемствы павінны праводзіць прафарыентацыйную работу для таго, каб конкурс быў забяспечаны. Таму што мэтавая падрыхтоўка — гэта асаблівая траекторыя паступлення, гэта адказны крок як для абітурыента, так і для арганізацыі-заказчыка кадраў. І яго трэба зрабіць такім чынам, каб сапраўды найбольш матываваны і падрыхтаваны абітурыент у далейшым стаў спецыялістам канкрэтнай арганізацыі», — дадаў Сяргей Пішчоў.