Міністэрства адукацыі зацвердзіла парадак удзелу ў міжнародных адукацыйных праграмах. У прэс-службе ведамства растлумачылі асноўныя навацыі

«Якасць беларускай адукацыі прызнана не толькі ў нас у краіне, але і далёка за яе межамі. Актыўны акадэмічны абмен ведамі і вопытам — ключ да развіцця нацыянальнай сістэмы адукацыі і падрыхтоўкі канкурэнтаздольных спецыялістаў сусветнага ўзроўню», — адзначылі ў міністэрстве.

Беларусь заключыла 119 міжнародных дагавораў у сферы адукацыі, уключаючы 16 пагадненняў аб узаемным прызнанні дакументаў аб адукацыі. Установы адукацыі супрацоўнічаюць з міжнароднымі партнёрамі ў рамках больш як 6 тыс. прамых дагавораў.

Колькасць замежных студэнтаў у Беларусі вырасла да 35 тыс. у 2025 годзе. Геаграфія навучання грамадзян іншых дзяржаў пашырылася да 124 краін. Колькасць сумесных навуковых і адукацыйных структур павялічылася амаль удвая.

«У гэтых умовах асабліва важна забяспечыць празрысты і справядлівы механізм адбору беларускіх студэнтаў для навучання ў ВНУ-партнёрах на парытэтнай аснове. 8 снежня 2025 года Міністэрства адукацыі зацвердзіла пастанову нумар 209, якая ўводзіць адзіны парадак удзелу ў міжнародных адукацыйных праграмах у рамках двухбаковых дагавораў Беларусі», — растлумачылі ў прэс-службе.

Асноўныя ўмовы ўдзелу ў адборы: навучанне ва ўстанове адукацыі Беларусі на момант падачы заяўкі; валоданне замежнай мовай на ўзроўні, дастатковым для засваення праграмы бакалаўрыяту або стажыроўкі; сярэдні бал бягучай атэстацыі — не ніжэйшы за 8 (па 10-бальнай шкале). Таксама патрабуецца наяўнасць дакументальнага пацвярджэння аб вызваленні ад воінскага абавязку на перыяд навучання за мяжой і пісьмовае абавязацельства вярнуцца ў Беларусь пасля завяршэння навучання.

«Гэты крок накіраваны на тое, каб лепшыя студэнты маглі атрымаць сусветны вопыт, а затым прымяніць яго на карысць нашай краіны», — дадалі ў прэс-службе.