Адным з напрамкаў канцэпцыі дзяржаўнай жыллёвай палітыкі Беларусі да 2030 года стане павелічэнне аб’ёму будаўніцтва арэнднага жылля. «Яно запатрабавана, яно дае магчымасць грамадзянам быць мабільнымі, перамяшчацца па рэспубліцы, не прывязвацца да нейкага аднаго месца, пабудаваўшы ўласнае жылое памяшканне. Таму фонд арэнднага жылля будзе павялічвацца, аб’ёмы яго расці. Гэта ўжо і цяпер прасочваецца. Калі мы возьмем 2019 год, то мы пабудавалі ўсяго 113 тыс. кв. У 2024 годзе ў нас аб’ём павялічыўся да 427 тыс. кв. На гэты год аб’ёмы будаўніцтва плануюцца на ўзроўні 442 тыс. кв.», — расказала Іна Пінкоўская.

Такія кватэры будуюцца за кошт дзяржавы, а таксама за кошт арэнднай платы, якая паступае ад грамадзян, якія пражываюць у такім жыллі.

Найбольш масавая запатрабаванасць арэнднага жылля адзначаецца ў абласных цэнтрах і іншых буйных гарадах з вялікай колькасцю насельніцтва. «У маленькіх населеных пунктах попыт меншы, але ён ёсць. Акцэнт у будаўніцтве арэнднага жылля сёння робіцца на паляпшэнне жыллёвых умоў грамадзян, якія адносяцца да найбольш запатрабаваных спецыяльнасцей. Рэгіёнам прадастаўлена права вызначаць катэгорыі найбольш запатрабаваных прафесій грамадзян, якім будуць выдадзены кватэры, каб іх замацаваць на месцах», — расказала прадстаўнік Мінбудархітэктур. Неабходнасць складання такіх пералікаў прадугледжана ўказам Прэзідэнта Рэспублікі Беларусь ад 27 студзеня 2025 года нумар 38 «Аб асаблівасцях прадастаўлення і выкарыстання арэнднага жылля».

У Мінгарвыканкаме зараз вядзецца актыўная работа па вызначэнні такіх катэгорый грамадзян.