Па ўсёй краіне ў акцыі бяруць удзел больш за 1 400 аб’ектаў турыстычнай сферы: музеі і заказнікі, экапаркі і аграсядзібы, атэлі і здраўніцы, галерэі і спартыўныя ўстановы. Адны прапануюць бясплатную праграму, іншыя — зніжкі на пэўныя паслугі, трэція запрашаюць на дні адчыненых дзвярэй.
Мінск таксама падрыхтаваўся: заяўку на ўдзел падалі больш за 140 устаноў, арганізацый і экскурсаводаў. Большую долю складаюць школьныя музеі. Вылучаецца гучнай назвай віртуальная экскурсія школы № 44 імя Якуба Коласа — 3 чэрвеня запрашаюць убачыць «Мінск, які мы страцілі».
- Далучыцца да прыгожага запрашае і Лошыцкая сядзіба. Тут запланаваны аглядная экскурсія і танцавальны майстар-клас 3 і 5 чэрвеня.
- Бясплатна наведаць пакой манаха прапануе гатэль «манастырскі» 6 чэрвеня. А гасцінічныя комплексы «Турыст» і «Арбіта» завабліваюць дэгустацыямі 3 і 5 чэрвеня адпаведна, з 14:00 да 18:00.
- Ежу для душы прапануюць Свята-Духаў кафедральны сабор 2, 3, 4 і 5 чэрвеня і Свята-Петра-Паўлаўскі сабор 6, 7 і 8 чэрвеня.
- Інфармацыйна-турысцкі цэнтр «Мінск» запрашае на бясплатную экскурсію па Верхнім горадзе 3 чэрвеня, а 5-га і 6-га прапануе зрабіць на майстар-класах турыстычныя сувеніры «Мінск — бібліятэка ўражанняў» і «Мінск прыгожы і гасцінны».
- Зазірнуць за кулісы Беларускага дзяржаўнага акадэмічнага тэатра юнага гледача можна 5 і 6 чэрвеня з 13:00 да 15:00. А ўбачыць, як здымаюць кіно на «Беларусьфільме», 2 і 4 чэрвеня.
- Вялікую каманду ўдзельнікаў выставілі прамысловыя гіганты сталіцы — Музей гадзіннікавай справы, «Керамін», МТЗ, МАЗ, «Слодыч»...
- Адчуць спартовы дух «Дынама» можна 2 чэрвеня. А прыняць удзел у трэніроўцы па велафрыстайле і катанні на роліках у цэнтры алімпійскага рэзерву па веласіпедным і лядовых відах спорту — 5 і 6 чэрвеня.
Падрабязней з усімі ўдзельнікамі акцыі, умовамі наведвання і запісам на мерапрыемствы можна азнаёміцца тут.
